Бекназаров экс-президент деген макамды алып салууну сунуштады. Жапаров менен Бекешев эмне тууралуу сүйлөшүштү? Күн ичинде орун алган саясий окуялардын топтому бир шилтемеде

Бүгүн, 2-декабрь. Бул күнү саясий окуялар, жаңылыктар көп болдубу? Алардын баарынан кабардар болууга үлгүрбөй калсаңыз, бул материал сиз үчүн. Анткени SUPER.KG порталы күндүн "туздуу" саясий окуяларынын топтомун алдыңызга сунуш кылат.

Экс-президент деген макамды алып салуу сунушталды

Бүгүн Конституциялык кеңешменин "Мамлекеттик бийлик органдары" секциясынын жыйыны өттү. Анда Кыргыз өлкөсүнүн Малайзиядагы элчиси, кеңешменин мүчөсү Азимбек Бекназаров экс-президент деген макамды алып салууну сунуш кылды.

"1993-жылы кабыл алынган Конституцияга кайтышыбыз керек. Анткени мамлекет башчысы да макам үчүн, жеңилдиктер үчүн элди таштап салышарын тажрыйба көрсөттү. Айрым экс-президенттер чет мамлекеттерде өлкө атынан сүйлөп жатышат, бул туура эмес. Алар өздөрүн гана ойлошуп, мамлекет кандай абалда турганы эч кимди кызыктырбайт. Мыйзамда көрсөтүлбөсө деле алардын экс экендиги баарына маалым", - дейт ал.

Азыркы Баш мыйзамдын 69-беренесине ылайык, кызматтан четтетилген мурдагы президенттер Кыргыз Республикасынын экс-президенти деген наамга ээ болушат. Экс-президенттин статусу мыйзам менен белгиленет. Экс-президентке берилчү артыкчылыктар "Президенттин ишмердүүлүгүнүн кепилдиктери жана экс-президенттин макамы тууралуу" мыйзамда жазылган.

Кол тийбестик;
Укуктук, социалдык жана башка кепилдиктер;
Материалдык жактан камсыз кылуу;
Тиричилик жактан камсыз кылууга жана транспорттук тейлөөгө болгон укугу;
Үй-бүлө мүчөлөрүнүн социалдык кепилдиктери жана аларды материалдык жактан камсыз кылуу;
Ар-намысын жана аброюн коргоо.

Атамбаев ден соолугуна байланыштуу соттук отурумга келе алган жок

Бишкек шаарынын Биринчи Май райондук сотунда Кой-Таш окуясы боюнча соттук отурум белгиленген. Мурдагы президент Алмазбек Атамбаев ден соолугуна байланыштуу сотко келе албай калгандыктан отурум 9-декабрга жылдырылды.

Буга чейин дагы Атамбаев бир канча жолу ден соолугуна байланыштуу соттук отурумдарга катыша албай келген. Атамбаев учурда №47 колонияда кармалып жатат.

Бул иш боюнча 19 киши айыпталып, алардын 14 адамдын иши сотко өткөн. Азыркы отурумдарда күбөлөр суралып жатат.

Айыпталуучулардын катарында Алмазбек Атамбаев, Фарид Ниязов, Равшан Жээнбеков, Ирина Карамушкина, Асел Кодуранова, Кундуз Жолдубаева, Канат Сагымбаев, Мээрбек Мискенбаев, Фархат Баабиев, Канат Осмоналиев, Рыспек Карыпбек уулу, Марат Шаменов, Нооруз Капарбек уулу жана Асангелди Какебаев бар.

Дастан Бекешев Садыр Жапаров менен жолукканын айтты

Жогорку Кеңештин депутаты Дастан Бекешев социалдык тармактагы баракчасына президенттикке талапкер Садыр Жапаров менен жолукканын жарыялады.

"Садыр Жапаров менен маектештим. Дароо айтам, эч кандай колдоо жана кызмат орун сураган жокмун. Мамлекетти башкаруу формасын жана Конституциялык реформалар тууралуу талкуу кылдык. Мен ал колдобогон, парламенттик башкаруу формасын колдодум", - деп жазган депутат.

Буга чейин Дастан Бекешев Конституциянын жаңы долбооруна каршы чыккандардын бири. Ал 22-ноябрда Бишкекте Конституциянын жаңы долбоорун кабыл алууга каршы "Референдумга жол жок!" аталышындагы тынчтык жүрүшүнө дагы чыккан.

Конституциялык кеңешменин талкууга алынган кандай сунуштары болду?

SUPER.KG порталы 20-ноябрдан бери иш алып барып жаткан Конституциялык кеңешменин жыйындарында айтылган кызыктуу сунуштардын топтомун тизмектеди. Кеңешменин мүчөсү Кыргыз Республикасынын аталышын Кыргыз Эл Республикасы деп өзгөртүүнү сунуштаса, дагы бир мүчөсү Нурлан Шерипов өлүм жазасын киргизүү керектигин айткан. Ал эми Эдил Байсалов болсо Жогорку Кеңештин аталышын Курултай же Улут жыйыны деп атоо зарылдыгын билдирди. Ошону менен катар эле расмий тил тууралуу дагы кеп козголгон. Кеңешменин мүчөсү Садирдин Төралиев Кыргыз өлкөсүндө кыргыз тилинде гана атайын макам болушу керек экендигин айткан. Башкасы Максат Чакиев англис тилин экинчи расмий тил кылып киргизүүнү белгилеген.