Айсулуу Тыныбековага берилген батирди кайтарымсыз кылуу маселеси чечилди

Бишкек шаардык кеңеши конфискацияланган муниципиалитеттин курамындагы үч бөлмөлүү батирди Айсулуу Тыныбековага өткөрүп берүү чечимин кабыл алды. Бул тууралуу шаардык кеңештен билдиришти.

Маалыматка ылайык, Тыныбекова Бишкектин экс-мэри Нариман Түлеевден конфискацияланган Москва көчөсүндөгү үч бөлмөлүү батирге ээ болду. Мындай чечим кечээ, 2-декабрда шаардык кеңештин жыйынында кабыл алынган.

"Бишкек шаардык кеңеши конфискацияланган муниципиалитеттин курамындагы үч бөлмөлүү батирди Айсулуу Тыныбековага өткөрүп берүү чечимин кабыл алды. Ага ылайык токтом кабыл алынды", - деп билдиришти аталган мекемеден.

Эске салсак, экс-президент Сооронбай Жээнбеков Айсулуу Тыныбековага 2019-жылдын сентябрь айында Бишкек шаарындагы 3 бөлмөлүү батирдин ачкычын тапшырган. Бирок көп өтпөй Москва көчөсүндөгү батир Бишкектин экс-мэри Нариман Түлеевдин мүлкү конфискациялангандан кийин шаардын менчигине өтүп кеткени белгилүү болгон.

Ал эми Бишкек шаардык мэриясы Айсулуу Тыныбекованын кыргыз спортун өнүктүрүүгө кошкон жогорку салымын эске алуу менен ага берилген үч бөлмөлүү батирди кайтарымсыз негизде ыйгаруу боюнча токтом долбоорун иштеп чыгып, шаардык кеңешке кароосуна жөнөткөнү кабарланган.

Бул масленин тегерегинде бир жыл бою түрдүү талаш-тартыштар жүрүп келген. Аягында шаардык кеңеш бардык талаштуу суроолорго чекит койду.