Окуучулардын кышкы каникулун узартууну министрлик колдогон жок

Билим берүү жана илим министрлиги мектеп окуучуларынын кышкы каникул убактысын узартуу сунушун колдобойт. Бул тууралуу аталган министрликтин басма сөз кызматы SUPER.KG порталына билдирди.

Маалыматка ылайык, билим берүү процесси дистанттык түрдө окуу планынын негизинде жүргүзүлөт жана ал үчүн атайын сааттар бөлүнгөн.

"Бул сааттарды окуу процессинен алып салуу мүмкүн эмес. Буга байланыштуу Билим берүү жана илим министрлиги каникул убактысын узартуу демилгесин колдобойт.

Ошол эле учурда эпидемиологиялык кырдаалга байланыштуу министрлик Бишкек шаарынын билим берүү башкармалыгына мүмкүн болсо мектепке келбей, үйдөн сабак өткөн мугалимдердин коопсуздугун максималдуу түрдө камсыз кылууну сунуштайт", - деп билдирди басма сөз кызматынан.

Эске сала кетсек, кечээ 2-декабрда депутат Валентина Лисниченко ата-энелер онлайн окутуудан чарчаганын, балдар арасында суицид көп катталып жатканын белгилеп, кышкы каникулду 14-декабрдан 2021-жылдын 17-январына чейин узартууну, андан кийин салттуу режимде окутууну баштоону сунуштаган.