Чүйдүн Байтик айылында 23 бала тамакка ууланып, ооруканага түштү

Чүй облусунун Аламүдүн районундагы Байтик айылында жаш балдардын массалык уулануусу катталды. Бул туурасында Саламаттыкты сактоо министрлигинин басма сөз кызматынан билдирди.

Маалыматка ылайык, 8-декабрда саат 23:00 чамасында Бишкектеги 3-балдар ооруканасына тамакка ууланган 23 бала (8 жаштан 20 жашка чейинкилер) келип түшкөн. Алардын баарына керектүү жардамдар көрсөтүлгөн. Учурда балдардын абалы салыштырмалуу канааттандырарлык деп бааланууда.

Аламүдүн районунун Мамлекеттик санитардык-эпидемиологиялык көзөмөлдөө борбору бул окуя боюнча иликтөө жүргүзүү үчүн эпидемиологиялык топ түздү. Анын жыйынтыгы боюнча кошумча маалымат бериле тургандыгын министрликтен кабарлады.