Бишкекте дайынсыз болуп жаткан 31 жаштагы аялдын жансыз денеси үйүнөн табылды. Ал муунтулуп, андан соң бычакталган

Бишкектин Октябрь РИИБинин кызматкерлери 31 жаштагы аялдын өлүмүнө шектүүлөрдү кармады. Бул тууралуу райондук бөлүмдөн билдиришти.

Маалыматка ылайык, 8-декабрь күнү РИИБге шаар тургуну арыз менен кайрылган. Анда 1989-жылы туулган Н.А. дайынсыз болуп изделип жатканын, ал 7-кичи райондо жашарын жана жумушка чыкпай, телефон чалса албай жатканы жазылган.

Октябрь РИИБинин ыкчам-тергөө тобу аталган дарекке барып эшикти ачып киргенде, дайынсыз болуп жаткан аялдын жансыз денеси табылган. Алгачкы кароодо эле маркум киши колдуу каза болгону аныкталган. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Шектүүлөрдү издөө иштери башталган.

Көп өтпөй шектүү катары 1988-жылы туулган Ю.Т. аттуу жаран кармалып, убактылуу кармоочу жайга киргизилген.

"Териштирүүдө шектүү маркумдун үйүнө келип, андан карызга 3 жарым миллион доллар акча каражатын сураган. Ортодо пикир келишпестик чыгып, маркумду муунтуп, ашкана бычагы менен моюнга сайып, андан соң из жашырып качып кеткен. Ошондой эле шектүү кармалганда жанынан Макаров үлгүсүндөгү тапанча, 4 бычак, жана "ИИМдин өз коопсуздугу" аталышындагы күбөлүк табылган. (ИИМде мындай бөлүм жок). Учурда шектүүнүн башка кылмыш иштерге тиешеси бар же жогу текшерилип, териштирүү иштери жүрүүдө", - деп жазылат маалыматта.