Ички иштер министринин ардагери, отставкадагы полковниги, акын, жазуучу Маматибраим Самиев каза болду

Ички иштер министринин ардагери, отставкадагы полковниги, акын, жазуучу Маматибраим Самиев 13-декабрда оорудан улам каза болду. Маалыматты журналист Тургунбай Алдакулов социалдык тармактагы баракчасында жазган.

"Сиз менен коштошуу сөзүн жазуу кандай оор болду. Кечээ эле сыясы кургай элек китебиңиздин жүз ачарын өткөрүп, адатыңызча жүзүңүздөн нур жаап, дагы көптөгөн эмгектерди жасай турган жалындуу демиңиз менен баарыбызга кайрат берип узатпадыңыз беле?

Кыргыздын Манасын изилдеп бул жагы Алтайга, ары жагы Кытайга чейин мурас издеп, из кууп, барып келдиңиз эле. Сиздин жаркын элесиңиз жүрөгүбүздө түбөлүк сакталат" , - деп жазылат журналисттин билдирүүсүндө.

Маматибраим Самиев Ош облусунун Өзгөн районунда туулган.

Ички иштер органдарында 1983-жылтан тарта иштеп баштап, катардагы милиция кызматкеринен подполковник наамына чейин жеткен.

Комсомолдук бригадаларды жетектеп, Ош шаарынын Кыргызстан кең көчөсүн курууга, эски үйлөрдү тазалоого алдыңкы сапта катышкан. Ошондой эле Ош шаарындагы көп кабаттуу үйлөрдү курууга, шаардын инфраструктурасын түптөөгө бараандуу салым кошкон.

2006-жылдан тарта акыйкатчынын Ош облусу боюнча ыйгарым укуктуу өкүлү болуп эмгектенип, жергиликтүү элдин укуктук маселелерин чечүүгө жакындан жардам берген.

Маматибраим Самиев элге акын, жазуучу катары дагы таанылган. Жарык көргөн китептери: “Аалы акеден тарагандардын ата теги”, “Кыргыз байыркы түптүү, улуу эл”, “Элим менин саяпкерим”, “Манас” эпосунда аялзатынын үй-бүлөгө жана коомго болгон таасири”, “Байсалдуу сапарлар”, “Биздин мектеп”, “Агентурист”, “Меккеде болгон окуя”, “Мугалим”, “Теледе жарык көргөн интервьюлар” жана башкалар.

Самиев үзүрлүү эмгегинин натыйжасында ИИМдин, СССР ИИМнин ведомстволук медалдары, акыйкатчынын, Улуттук жазуучулар союзунун, Улуттук илимдер академиясынын, Журналисттер союзунун, Ош шаарынын мэриясынын, Өзгөн, Лейлек райондорунун жана Ош облустук мамлекеттик адмнистрацияларынын Ардак грамоталары менен сыйланган.

SUPER.KG порталынын эмгек жамааты Маматибраим Самиевдин дүйнөдөн кайткандыгына байланыштуу үй-бүлөсүнүн, жакындарынын аза кайгысын тең бөлүшүп, терең кайгыруу менен көңүл айтат.