13 жашында зордукталган дагы бир кыз. Жактоочу бул ишти кайрадан карап берүүнү талап кылып, Жогорку Сотко кайрылды

Бишкекте жактоочу 13 жаштагы кызды зордуктоо ишин кайрадан карап берүүнү талап кылууда. Бул тууралуу адвокат Арман Кыйгырова билдирди.

Анын айтымында, аталган ишти кайрадан карап берүү үчүн Жогорку Сотко кайрылышкан.

"Бул ишти кайрадан карап берүү үчүн Жогорку Сотко кайрылып жатабыз. Буга чейин айыпталуучу 3 инстанцияда актап жиберилген. Мындан улам президентке, депутаттарга кайрылдык. Бирок азырынча жыйынтык жок", - деди жактоочу.

Ал эми жабырлануучунун апасы буга чейин айыпталуучу мыйзамсыз акталып кеткенин айтып өттү.

"Биз аталган ишти кайрадан карап берүүнү каалайбыз. Айыпталуучунун чоң атасы министрдин орун басары экен да. Ошон үчүн алар утуп кетишти. Бизди болсо айыпталуучуга компенсация (айыпталуучунун моралдык, материалдык чыгымдары) төлөп берүүгө милдеттендирди. Бул акыйкатсыздык да", - деди жабырлануучунун апасы.

Эске салсак, бул окуя 2016-жылы август айында болгон. Анда 13 жаштагы өспүрүм кыз соода борборлордун биринин дааратканасында зордукталган.