"Быйыл сасык тумоо менен ооругандардын саны дээрлик 2 жарым эсеге аз" дейт министрдин орун басары

Саламаттыкты сактоо министрлигинин ыкчам маалыматына ылайык, сасык тумоонун катталышы өткөн жылдын ушул мезгилине салыштырмалуу 2,4 эсеге төмөн. Мындай маалымат менен бүгүн, 15-декабрда саламаттыкты сактоо министринин орун басары Нурболот Үсөнбаев брифингде билдирди.

Профилактикалык эмдөө үчүн тобокел тобуна кирген адамдар жана калктын социалдык аярлуу катмарына киргендердин саны 905 миң адамды түзөт.

"Сасык тумоого каршы профилактикалык эмдөө калктын болжол менен 13 пайызын камтыйт. Планга ылайык, 1-2-этапта сентябрь айынан ноябрга чейин тобокел тобундагы 284 миң 188 адам сасык тумоого каршы эмдөө алган. 3-этапта декабрь айынын башында сасык тумоого каршы дагы 550 миң доза вакцина алынган. Учурда вакцина бардык район-шаарларга бөлүштүрүлүп берилди. Чүй, Талас, Ысык-Көл, Нарын облустарындагы жана Бишкек шаарындагы тобокел тобуна кирген адамдар арасында эмдөө жүрүп жатат", - деп белгиледи Үсөнбаев.