"Обама, Медведев менен талкуулаганбыз". Нурсултан Назарбаев Кыргыз өлкөсүнөн Акаев менен Бакиевди кантип качырганын айтып берди (видео)

Казакстандын тунгуч президенти Нурсултан Назарбаев журналист Айгүл Идиловага берген интервьюсунда суроолоруна жооп берип жатып, Кыргыз өлкөсүнүн мурдагы президенттери Аскар Акаев жана Курманбек Бакиевдин качып кетишине кантип жардам бергенин айтты.

Анын айтымында, ал Аскар Акаевди тик учак менен Тараз шаарына алып кеткен.

"Анда абал оор болчу, атышуу болушу мүмкүн экен. Куралдуу тиреш болуп кетпесин деп аны Кыргыз өлкөсүнөн алып чыгып кеттим. Андан ары тигил жакка (ред. Москвага) кетти. Андан кийинки президент (ред.Курманбек Бакиев) менен дагы ошол эле көрүнүш кайталанды. Ал Ош шаарында өз тарапташтарын чогултуп, куралдандырып, Бишкекти көздөй барууга кам көрүп алыптыр. "Курманбек, сен эмне кылып жатасың, мындайдын эмне кереги бар? Кан төгүлөт. Мейли, кайра бийликти алдың дейли, анан кантип иштейсиң?" дегем. Мага ошол кезде өткөөл мезгилдин президенти Роза Отунбаева телефон чалып, "Эмне кылабыз, бир нерсе кылыңыз, Курманбекти тынчтандырып бериңиз" деп суранган. Бакиевди араң көндүрдүм. Ошол кезде Вашингтондо өзөктүк куралга каршы жыйын өтүп жаткан", - деп билдирди Казактсандын мурунку президенти.

Ошондой эле Нурсултан Назарбаев мындай кадамга барууга аргасыз болгонун кошумчалады.

"Ал кезде Орусияда Медведев, АКШда Обама президент болчу. Үчөөбүз шыбырашып жаткан сүрөт бар. Ошондо Кыргыз өлкөсүндө жарандык согуш башталып кетмей болду деп сүйлөшүп жатканбыз. Мен Бакиевди Бишкектен алып чыгып кетейин, орусиялык истребителдер менин учагымды коргоп беришсин деп сунуш кылгам дейт Назарбаев. Ал кезде Казакстандын коргоо министри Адилбек Жаксыбеков болгон. Ал Назарбаевге Ош аэропортунда учуп-конуучу тилкеге таш төгүп салышты деген маалымат бар экенин айткан. Мен учакты жибере бер, эгер конуу тилкесинен таш көрүнсө кайрылып кете берсин дегем. Эгер жок болсо алып келе берет дегем. Бирок ал жерде эч кандай таш болгон эмес. Курманбекке жакындарыңды даярдап тур деп айткам. Ошентип аны үй-бүлөсү менен чыгарып кеттик. Эгер бул нерсени кылбасак, кан төгүлмөк, алар мындай болуп кетерин унутуп коюшат", - деди мурдагы президент Нурсултан Назарбаев.