Эл аралык издөөдө жүргөн Өзбекстан жаранына кыргыз паспорту берилгендиги аныкталды

Мамлекеттер аралык издөөдө жүргөн жаранга паспортту мыйзамсыз берүү фактысын аныкталды. Бул тууралуу Экономикалык кылмыштуулукка каршы күрөшүү кызматынан билдиришти.

Маалыматка ылайык, Өзбекстанда "өлкөнүн конституциялык түзүлүшүнө кол салуу" беренеси менен соттолгон Хомидов Нематжон Сомиевич Кара-Суу шаарына каттоого тургузулуп, кыргыз паспортуна мыйзамсыз ээ болгон.

"Финполдун Кара-Суу, Алай жана Чоң-Алай райондору боюнча бөлүмү тарабынан паспорт берүү учурунда мамлекеттер аралык издөөдө жүргөн чет элдик жаранга мыйзамсыз паспорт берүү фактысы аныкталды. Тиешелүү иш-чаралардын жүрүшүндө паспорт алган учурда аталган чет өлкөлүк жаран 7 жылдан бери өлкө аймагына кирбей жүргөнү белгилүү болду. Ички иштер министрлигинин маалыматына ылайык, Хомидов Нематжон Сомиевич мамлекеттер аралык издөөдө жүргөн жана Өзбекстан Республикасында "Республикасынын конституциялык түзүлүшүнө кол салуу" беренеси боюнча соттолгон.

Бул факт "паспортту мыйзамсыз берүү" беренесинде каралган кылмыш белгилери боюнча катталып, учурда тергелип жатат", - деп айтылат маалыматта.