Депутаттар Бишкектеги кара түтүн боюнча токтом аткарылбаганына нааразы. Назарбаев Акаев менен Бакиевди кантип качырганын айтып берди. Күн ичинде орун алган саясий окуялардын топтому бир шилтемеде

Бүгүн, 16-декабрь, күнгө шаршемби. Күндөгүдөй эле бул күн да саясий окуяларга, жаңылыктарга бай болду. Алардын баарынан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун алдыңызга сунуш кылат.

Депутаттар Бишкектеги кара түтүн боюнча токтомдун аткарылышын сындады

Бүгүн Жогорку Кеңеште Бишкек шаарындагы кара түтүн боюнча токтом долбоорунун аткарылышы тууралуу маселе каралды. Анда бир катар депутаттар сын пикирин айтышты.

Депутат Марлен Маматалиев Бишкектеги кара түтүн боюнча токтом долбоору аткарылбаганын билдирди.

"Чындыгында кабыл алынган токтомдун дээрлик көбү аткарылган жок. Кара түтүн жоголгон жок. Жөнөкөй нерселер жасалган эмес экен. Биз электромобиль тууралуу жаздык эле. Пилоттук түрдө болсо дагы мамлекеттик унааларды электромобилге өткөрөлү", - дейт депутат.

Ал эми депутат Абдывахап Нурбаев Бишкектеги кара түтүн боюнча токтом долбоорунун аткарылышы боюнча тийиштүү жетекчилерге чара көрүүнү сунуштады.

"Жогорку Кеңеш токтом долбоорун кабыл алып берген. Токтом долбоор аткарылган эмес. Бул маселени парламенттин комитеттеринде карап, тийиштүү жетекчилерге чара көрүлүшү керек", - деди ал.

Вице-спикер Мирлан Бакиров кара түтүн боюнча токтом долбоорунун аткарылышы "канааттандырарлык эмес" экенин айтты.

"2019-жылдан бери канча убакыт өттү? Бул боюнча маселе каралганда бир дагы жетекчи кызматтагылар келген жок. Жалаң орун басарлары отурат. Бул Жогорку Кеңешке болгон жоопкерчиликсиз мамиле. Ошондуктан бул маселени комитетке кайтаралы. Бул токтомдун аткарылышы "канааттандырарлык эмес". Кызматтан алына тургандар алынсын. Бир дагы өкмөттүк орган жооп бере албай жатат", - деди вице-спикер.

Былтыр Марлен Маматалиевдин демилгеси менен кара түтүндү жок кылуу боюнча токтом долбоору кабыл алынган. Ошол учурда SUPER.KG порталы "Депутаттар өкмөт Бишкекти каптаган ышка көңүл бурбай жатканын айтышты. 1 миллиондой киши жашаган борбор шаардын калкынын саламаттыгы өкмөттү эмне үчүн ойлондурбайт?" деген собол салган. Ошондо азыркы курчап турган айлана-чөйрөнү коргоо мамлекеттик агенттигинин директору Динара Кутманова бул маселеге өкмөт көңүл бурбай жатканын айткан. Аз кезде ал эколог катары комментарий берген. Бүгүн ал Жогорку Кеңештин жыйынына дагы катышкан жок.

13 жашар кызды зордуктагандарга чыккан соттун чечими Жогорку Кеңеште да айтылды

Депутат Айсулуу Мамашова 13 жашар кызды зордуктагандарга карата сот чечими боюнча маселени көтөрдү.

"Биз дайыма "балдар - биздин келечегибиз" деп айтабыз. Маалымат каражаттары "13 жашар кызга каршы болгон сот чечим чыгарды" деп жазып жатат. Билем биз соттун ишине кийлигише албайбыз. Бирок бул иш боюнча маалымат алышыбыз керек. Тийиштүү органдарды чакырып бул маселени талкуулайлы. Кичинекей баланын тагдыры сындырылды. 3 зөөкүрдүн бирөөсү гана отургузулду. Бүгүн бул маселени кароого жетишпесек эртең карайлы", - деди ал.

Вице-спикер Мирлан Бакиров бул маселе алгач комитетте каралып, анан палатага чыгышы керектигин айтты.

Ысык-Көлдө 13 жаштагы кызды үч эркек жарым жыл зордуктап жүргөн делген окуянын чоо-жайы жарыяланган.

Ал эми интернет колдонуучулары 13 жаштагы кызды зордуктагандарды актап жибергенине нааразы болушуп, Тоң районунун соту Сабыр Соодонбековго карата кызматтык текшерүү жүргүзүүнү талап кылышып, онлайн митинг өткөрүшүүдө. Кыздын атасынын бир тууган иниси Талант Байсеитов соттун чечимине нааразы болуп, акыйкат издеп Бишкекке келген.

Нурсултан Назарбаев Кыргыз өлкөсүнөн Акаев менен Бакиевди кантип качырганын айтып берди

Казакстандын тунгуч президенти Нурсултан Назарбаев журналист Айгүл Идиловага берген интервьюсунда суроолоруна жооп берип жатып, Кыргыз өлкөсүнүн мурдагы президенттери Аскар Акаев жана Курманбек Бакиевдин качып кетишине кантип жардам бергенин айтты. Ал Аскар Акаевди тик учак менен Тараз шаарына алып кеткен.

"Анда абал оор болчу, атышуу болушу мүмкүн экен. Куралдуу тиреш болуп кетпесин деп аны Кыргыз өлкөсүнөн алып чыгып кеттим. Андан ары тигил жакка (ред. Москвага) кетти. Андан кийинки президент (ред. Курманбек Бакиев) менен дагы ошол эле көрүнүш кайталанды", - дейт ал.

Өкмөттүн аппаратынын бөлүм башчысы коррупцияга шектелип кармалды

Өкмөттүн аппаратынын жетекчисинин биринчи орун басары рангындагы коргоо, укуктук тартип жана өзгөчө кырдаалдар бөлүмүнүн башчысы А.М. кармалды.

УКМКнын жана Аскер прокуратурасынын мекемелер аралык ыкчам тергөө тобу айрым мамлекеттик органдардын жана өкмөттүн аппаратынын кызмат адамдары тарабынан радио жыштыктарды сатып алуу-сатуу боюнча келишим түзүүдө жана аларды пайдаланууга лицензияны кайра берүүдөгү коррупциялык фактылар боюнча сотко чейинки өндүрүш жүргүзүп жатат.

"15-декабрда аталган иштин алкагында Жазык-процесстик кодексинин 98-беренесинин негизинде өкмөттүн аппаратынын жетекчисинин биринчи орун басары рангындагы коргоо, укуктук тартип жана өзгөчө кырдаалдар бөлүмүнүн башчысы А.М. кармалып, УКМКнын убактылуу кармоочу жайына киргизилди", - деп жазылат УКМКнын маалыматында.