Москвада бычакталып каза тапкан 19 жаштагы Кыргыз жараны боюнча элчилик маалымат берди

Москва шаарында белгисиз адам тарабынан бычакталып каза тапкан 19 жаштагы бала Кыргыз өлкөсүнөн келген, бирок ал Орусиянын жараны болгон. Мындай маалыматты SUPER.KG порталына Кыргыз өлкөсүнүн Орусиядагы элчилигинен билдиришти.

"Маркум Орусиянын жараны болгондуктан ишке тийиштүү көп материалдарды бизге беришкен жок. Бирок анын Кыргыз өлкөсүнөн келгени аныкталды. Учурда окуя боюнча кылмыш иши ачылып, тергөө жүрүп жатканын укук коргоо органдары билдиришти. Шектүүлөр дагы бар экен. Бир аптанын ичинде дагы толук маалымат берилет. Учурда баланын атасы жүк-200 менен сөөктү алып кетүү үчүн даярдыктарды көрүп жүрөт. Баланын апасы тууралуу маалымат жок, бирок атасы Орусияда жашаары маалым", - деди элчиликтин маалымат катчысы.

Эске салсак, кечээ, 16-декабрда Москвада курьер болуп иштеген Кыргыз өлкөсүнөн келген 19 жаштагы баланын бычакталып каза тапканы тууралуу маалымдалган. Маалыматты орус басылмасы укук коргоо органдарына таянуу менен жазып чыккан. Анда бычак баланын жүрөгүнө дагы тийгендиктен, аны аман алып калуу мүмкүн болбой калганы айтылган.