Орусиялык спортчулар 2022-жылдын аягына чейин желеги менен мелдештерге катыша албайт

Бүгүн, 17-декабрда Швейцариянын Лозанна шаарында Спорт Арбитраждык Соту Орусия спортчуларына 2022-жылдын 16-декабрына чейин мамлекеттик желек менен мелдештерге катышууга тыюу салды. Бул тууралуу аталган өлкөнүн басылмалары жазып чыгышты.

Ошол эле учурда, мелдештерде күйөрмандар желекти көтөрүп турса болот. Муну менен Орусия эмдиги жылы өтө турган "Токио-2020" жайкы олимпиада оюндарына желеги жок катышат.

WADA'нын Аткаруу комитети 2019-жылдын 9-декабрында Орусиянын спортчуларына каршы санкцияларды киргизген. Бул чечимдин кабыл алынышына Орусия спортчуларынын 2012-2015-жылдар аралыгындагы текшерүүлөрүнүн жыйынтыгы камтылган Москвадагы допингге каршы лабораториясынын маалымат базасы бурмаланган түрдө өткөрүлүп берилгендиги жөнүндө тыянагы негиз болгон.