Адахан Мадумаровдун "коркутуулар болуп жатат" деген кайрылуусу боюнча Башкы прокуратурага маалымат берилди

Президенттикке талапкер Адахан Мадумаров Ысык-Көл облусундагы үгүт иштерине белгисиз адамдар тарабынан тоскоолдук жаралып жатканын КТРКнын түз эфиринде билдирген. Буга байланыштуу БШКнын алдындагы ыкчам аракет жасоо координациялык тобуна маалымат келип түшкөнү тууралуу БШКнын сайтында жарыяланды.

"Кыргыз өлкөсүнүн президенттигине Адахан Мадумаров КТРКнын эфири аркылуу анын Ысык-Көлдөгү штабынын мүчөлөрүнүн дарегине белгисиз адамдардан коркутуулар түшүп жаткандыгын билдирген. 17-декабрда бул тууралуу Башкы прокуратурага жана ИИМге маалымат берилди", - деп жазылат маалыматта.

Бул тууралуу талапкер Адахан Мадумаровдун КТРКдагы талапкерлердин жеке кайрылуусундагы эфирде сүйлөгөн сөзү төмөндөгүдөй болгон:

"Биринчи жолугушуумду касиеттүү Ысык-Көлүбүздөн баштайбыз деген жакшы оюм бар эле. Бирок ушунчалык жапайычылыктын чегине келдик. Мадумаровдун штабын түзүп жаткандар жалынып-жалбарып менден суранышты. "Бизде жаш азаматтар пайда болду" дейт алар. "Эгерде бир жигиттен башка талапкерлерге чуркагандарды көрсөк, барып үйүңөрдү өрттөйбүз" деген коркутуулар менен жүрөт" дешти. Биз ушуну элдик бийлик деп эсептейбизби?", - дейт Мадумаров.

Бул боюнча Адахан Мадумаровдун өзүнө байланышуу мүмкүн болгон жок. Ал эми анын штабындагылар Мадумаров үгүт иштери менен Ош облусунун аймагына кеткенин билдиришти.

Шайлоо өнөктүгүндөгү үгүт иштери 15-декабрда башталган. Анын жүрүшүндө президенттик кызматка талапкерлер аймактарды жана шаарларды кыдырып үгүт компаниясын жүргүзөт. Мындан тышкары мамлекеттик телеканалдарда жана мезгилдүү басылмаларда аларга акысыз эфир убактылары, шайлоочуларга кайрылуу мүмкүнчүлүгү берилет. Учурда президенттикке 18 адам ат салышып жатат.

Президентти мөөнөтүнөн мурда шайлоо 2021-жылдын 10-январына дайындалган.