Мигранттардын кайтып келүүсү менен өлкөдө жумушсуздардын саны өстү

Мигранттардын массалык түрдө кайтып келүүсү өлкөдө жумушсуздардын санын арттырды. Бул туурасында бүгүн, 18-декабрда "Борбордук Азия кыймылы" жарандык өнөктөш платформасынын координациялык комитетинин төрайымы Нурия Темирова билдирди.

"Пандемия башталганда өлкөгө мигранттар массалык түрдө кайтып келди. Статистика боюнча айтсак, миграцияда жүргөн 50 миңден ашуун жарандарыбыз кайтып келди. Алардын кайтып келүүсү менен жумушсуздардын саны дагы өстү. Мурда өлкөдө 1 жумуш орунга 3-4 адам туура келсе, учурда 15 адам туура келүүдө. Эми дал ошол жарандарыбыз кайрадан кетүүгө арга таппай жүрүшөт, өлкөдө болсо жумуш жок. Аны менен катар эле көптөгөн үй-бүлөлөрдүн киреше булагы да кыскарды. Ал эле эмес биздин экономикабыз дагы мигранттар салган акчага көз каранды экендигин айтышыбыз керек. Бул көрсөткүч мамлекет жаңы жумуш орундарын түзүүсү керектигин көрсөтөт", - дейт Темирова.

Ошондой эле ал өзгөчө кырдаал учурунда мигранттарды колдоо фондун ачуу керектигин айтат.

"Пандемия учурунда чет жакта жүргөн мигранттарга абдан оор болду. Вирус күчөп, карантиндик чектөөлөр болуп жаткан маалда көптөгөн мигранттарыбыз жумуш орундарын жоготуп, акчасыз калышты. Айрымдары батир акысын төлөөгө, үй-бүлөсүн багууга каражат таппай калып кыйналып жатты. Мындан улам ушундай өзгөчө кырдаалдарда мигранттарды колдоо фондунун зарылдыгын айткым келет", - деди Нурия Темирова.