Бишкекте жарылган дүкөндө жабыркаган үч адамдын абалы айтылды

Бишкек шаарындагы сервистик тейлөө борборунан чыккан өрттөн жабыркаган үч кишинин абалы канааттандырарлык. Бул тууралуу Саламаттыкты сактоо министрлигинин басма сөз кызматынан Жылдыз Айгерчинова SUPER.KG порталына билдирди.

Маалыматка ылайык, денесинен күйүк алган үч жаран Бишкектеги травматология жана ортопедия илим изилдөө борборунда жатат.

"Жабыркаган адамдардын бирөө 33 жашта болсо, экөө 54 жана 58 жаштагы эркектер. Абалдары канааттандырарлык", - деп билдирди Айгерчинова.

Белгилей кетсек, бүгүн эртең менен саат 10 жарым чамасында борбордогу Саякбай Каралаев жана Иса Ахунбаев көчөлөрү кесилишкен жерде жайгашкан имаратта өрт чыгып, 57 жаштагы жаран каза болгон.

Октябрь РИИБи жана ӨКМ билдиргендей, өрт имараттын күнүмдүк керектелүүчү техникаларды оңдогон сервистик борборунан чыккан. Милициянын маалыматына ылайык, каза болгон киши дүкөндүн кызматкери.

Өрт толугу менен өчүрүлгөн. Учурда жарылуунун келип чыгуу себеби иликтенүүдө.

Кийин аталган дүкөн жарылгандагы видео интернетке жарыяланып, андан имаратта капысынан катуу жарылуу болгонун көрүүгө болот.