"Шайлоодо Форма-2 пайдаланылбайт". Республикалык штаб шайлоого даярдануу боюнча көчмө жыйын өткөрдү

Бүгүн, 22-декабрда президентти мѳѳнѳтүнѳн мурда шайлоону даярдоо жана аны ѳткѳрүү, ошондой эле шайлоо комиссияларына кѳмѳк кѳрсѳтүү боюнча республикалык штаб Чүй облусунун Ысык-Ата районунда кѳчмѳ жыйын ѳткѳрдү. Бул тууралуу Чүй облусунун ыйгарым укуктуу өкүлүнүн маалымат катчысы Аден Турусбеков SUPER.KG порталына билдирди.

Маалыматка ылайык, жыйынга БШКнын тѳрагасы Нуржан Шайлдабекова жана вице-премьер-министр, республикалык штабдын жетекчиси Максат Мамытканов, өкмөттүн Чүй облусундагы ыйгарым укуктуу өкүлү Мирбек Мияров жана башка бир катар жетекчилер катышып, калктын жана шайлоо участкаларынын 2021-жылдын 10-январында өтө турган шайлоого болгон даярдыгын талкуулашты.

"Жыйындын жүрүшүндѳ мамлекеттик органдардын жана жергиликтүү ѳз алдынча башкаруу органдарынын жетекчилерине бир катар милдеттемелер тагылды.

Ага ылайык, 2021-жылдын 10-январында шайлоону ѳткѳрүүнү даярдоо боюнча шайлоо комиссияларын байланыш, электр энергиясы, транспорт менен үзгүлтүксүз камсыз кылуу боюнча кѳмѳк кѳрсѳтүү, биометрикалык каттоодон ѳтүү, ѳздѳрүн шайлоочулардын тизмесинен тактоо боюнча калк арасында маалыматтык-түшүндүрүү иштерин жүргүзүү, жер-жерлердеги шайлоочулардын пайда болгон кѳйгѳйлѳрүн чечүү, ѳзгѳчѳ категориядагы жарандар менен иш жүргүзүү, шайлоону ѳткѳрүүнүн жүрүшүндѳ коронавирус инфекциясынын жайылышын алдын алуу боюнча санитардык-эпидемиологиялык талаптарды сактоо жана башка тапшырмалар берилди".

Ошондой эле шайлоочуларга 10-январда өтө турган шайлоодо Форма-2 пайдаланылбай турганын, андыктан шайлоочулар өздөрү каттоодо турган жеринен гана шайлай ала тургандыгын же болбосо жашаган жерине каттоого туруу керектиги тууралуу маалыматты калкка жеткирүү маселеси коюлганын кошумчалады.