150-180 жүргүнчү батат. Бишкек мэриясы монорельс - асма транспорттор долбоорун сунуштады

21-декабрда Бишкек шаарынын мэрясында вице-мэр Азиз Алымкулов "Бишкек монорельстүү транспорттук тутум" долбоорун сунуштады. Бул тууралуу шаардык мэриянын басма сөз кызматынан билдиришти.

Маалыматка ылайык, долбоор шаардык транспорттун сапатын жана туруктуулугун, ошондой эле жол коопсуздугун жогорулатууга багытталган.

"Монорельс - бул темир жол транспорту, асма транспорттун бир түрү, тез жүрүүнү камсыз кылат. Вице-мэр мындай тутумдун артыкчылыгы анын жүк көтөрүмдүүлүгү, ыңгайлуулугу, курулушу Ала-Арча жана Аламүдүн дарыяларын бойлой пландаштырылып жаткандыгын белгиледи", - деп айтылат маалыматта.

Монорельстердин жалпы узундугу 37 чакырым болсо, станциялардын саны 32, линиялардын саны 2. Жүк ташуу сыйымдуулугу 150дөн 180 жүргүнчүгө чейин болуп, бийиктиги 5-7 метрге чейин жетет. Долбоорду мамлекеттик-жеке өнөктөштүктүн алкагында ишке ашыруу пландаштырылууда.

Вице-мэр "Долбоор кымбат жана узак мөөнөттүү экендигин түшүнөбүз, бирок алдыга умтулуп, заманбап келечекке интеграциялануу керек" деп баса белгиледи.