Бишкекте ипотекалык насыя алган жарандар митингге чыгышты

Бишкектеги өкмөт үйүнүн жанында ипотекалык насыя алган жарандар насыянын пайыздарын төмөндөтүүнү талап кылып митингге чыгышты.

Митингдин катышуучулары өкмөт үйүнүн жанында "4 пайызга түшсүн! МИК - эл менен болсун. Элдин көйгөйү чечилбесе жоюлсун!" деген талаптары менен чогулушкан.

Ипотекалык насыя алган жарандар коронавирус пандемиясы учурунда келип чыккан каржылык кыйынчылыктардан улам 9 пайыздык насыяны төлөй албай жаткандыгын түшүндүрүп, мамлекеттик ипотекалык компаниядан ставканы 4 пайызга чейин түшүрүүнү талап кылышат. Насыя алуучулардын арасында үчүнчү айын төлөй албагандар да бар.

"Апам 2016-жылы "Капитал Банкынан" 12 пайыз менен насыя алып, андан кийин бул чен 9 пайызга түшүрүлгөн. Кийинчерээк, насыяны төлөөнүн эки формуласы бар экендигин билдик, бирок бизге эч ким бул тууралуу маалымат берген жок",- деп билдирет митингчилердин бири.