Бишкек шаарынын окуучулары эл аралык сынакта коло медалга ээ болушту

Бишкек шаарынын окуучулары Москвада онлайн өткөн эл аралык мегаполистердин олимпиадасында коло медалга ээ болушту. Бул тууралуу шаардык мэриядан билдиришти.

Маалыматка ылайык, сынак 16-19-декабрь аралыгында 4 сабактын (математика, физика, химия, информатика) негизинде өттү.

"Сынакка 14 жаштан 18 жашка чейинки чоң шаарларда жашаган окуучулар катышты. Бишкек шаарындагы окуучулардан түзүлгөн команда коло медалга ээ болушту", - деп жазылат маалыматта.

Аталган сынакка катышкан окуучулар 2019-2020-жылдары республикалык жана шаардык олимпиадалардын негизинде тандалып алынган.

Мегаполистердин олимпиадасы - эл аралык командалык таймаш. Жыл сайын Москвада өтөт. Биринчи жолу аталган сынак 2016-жылы өткөн. Анда ага 22 мегаполистен 173 окуучу катышкан.