Баткенде Жаңы жылдык балаты орнотулган жок. Башка облустардагы балатылар, ага кеткен каражаттар бир топтомдо

Саналуу күндөрдөн кийин 2021-жыл келет. Коронавирус пандемиясына байланыштуу быйыл Жаңы жылдык концерт жана салют уюштурулбайт. Бирок элге майрамдык маанай тартылоо максатында көчөлөр, кеңселер, үйлөр кооздолду. Мындай маанай Бишкек шаарынан тартып, бардык дубандардын борборлорунда болуп жатат. Тактап айтканда, Жаңы жылдык балатылар орнотулуп, чырактарды жандыруу иштери аягына чыкты.

Борбор калаадагы балатынын бийиктиги 25 метр, чырактары 10-декабрда жандырылган. Бишкек шаардык мэриясы балатыга аз суммада каражат кеткенин айтып, бирок так суммасын айтышкан жок.

Быйыл Ош шаарында былтыркы Жаңы жылдык балаты орнотулду. Шаарды, балатыны кооздогонго 700 миң сомго жакын каражат кеткенин шаардык мэриядан маалымдашты.

Жалал-Абад шаарында Жаңы жылдык балатыны, борбордук аянтты жана эки борбордук көчөнү жасалгалоого 800 миң сом сарпталган. Балатынын бийиктиги 28 метр.

Нарын шаарында борбордук аянт Жаңы жылга карата жасалгалап кооздолду. Балаты жасалгалоого жергиликтүү бюджеттен 98 миң сом жумшалды. Балатынын бийиктиги 12 метр.

Каракол шаарында былтыркы жылы коюлган бийиктиги 18 метр болгон Жаңы жылдык балаты кайрадан орнотулду. Балатыны кооздого керектелген оюнчуктар дагы эски, болгону кооздоо форматы башкача болгонун, ошондой эле быйыл пандемияга байланыштуу каражат сарпталбаганын шаардык мэриянын басма сөз кызматынан билдиришти.

Талас шаарындагы Жаңы жылдык балатыга 113 миң 825 сом каражат сарпталды.

Ал эми Баткен шаарында быйыл пандемияга байланыштуу Жаңы жылдык балаты орнотулбаганын мэриянын басма сөз кызматынан кабарлашты.