Бишкекте акча талап кылуу фактысына шектелип жаткан балбан Роман Царев улуттук курамадан четтетилди

Бишкекте акча талап кылуу фактысы менен кармалган Роман Царев ушул жылдын 23-декабрынан тартып улуттук курамадан четтетилди. Бул тууралуу Жаштар иштери, дене тарбия жана спорт боюнча мамлекеттик агенттиктен билдиришти билдиришти.

Маалыматка ылайык, мамлекеттик агенттик спортчулардын этикасы тууралуу эскертет.

"Спортчулардын этикасынын кодексинин 5-бөлүмүнүн 15-пунктуна ылайык Кыргыз Республикасынын грек-рим күрөшү боюнча курама команданын мүчөсү Роман Царев улуттук курамадан четтетилет. Кодекстин 5-бөлүмүндө тартипсиздик жоруктарды жасагандыгы үчүн, анын ичинде ушул кодекстин жоболорун аткарбаганда же туура эмес аткарганда кодекстин негизинде спортчуга карата атайын чаралар көрүлөөрү белгиленген. Эскерте кетсек, аталган кодекс 2017-жылы 3-майында Жаштар иштери, дене тарбия жана спорт боюнча мамлекеттик агенттиктин буйругу менен бекитилген", - деп жазылат билдирүүдө.

Белгилей кетсек, Мамагенттиктин 2019-жылы 12-сентябрда түзүлгөн Кыргыз Республикасынын улуттук курама командасына кабыл алуу жобосунун жана машыктыруучулардын кеңешинин негизинде, 2020-жылдын 11-12-январында өткөн Кыргыз Республикасынын грек-рим күрөшү боюнча чемпионатында Роман Царев 72 кг салмак категориясында 1-орунду ээлегендиги үчүн улуттук курама командасына киргизилген.