"Маселеңерди чече ала тургандарга кайрылгыла". Саламаттыкты сактоо министри жолугушуу учурунда залдан чыгып кетти

Саламаттыкты сактоо министри гепатиттин ар түрдүү формасы менен ооруган бейтаптар менен жолугушуу өткөрдү. Бул жолугушуу тууралуу видеону активист Нурказы Батырбеков социалдык тармактагы баракчасына жарыялады.

Анда көрүнүп тургандай, бейтаптар министрге көйгөйлөрү тууралуу айтышты.

"Менин келгениме 2 ай болду. Парламенттен суранып жатып, силерге 10 миллион сом бөлдүрдүк. Дагы 300 миллион сом сурап жатабыз. Биз муну кайра январда көтөрүп чыгабыз", - деди жолугушууда министр Алымкадыр Бейшеналиев.

"Биз 1 миллиард 400 миллион сом бөлүп берүүнү суранганбыз. 800 миллионду вакцинага, 600 миллионду дарыга сураганбыз. Сизге кайра-кайра кайрылдык. Бирок бизге кайдагы жомокторду айтып жатасыз", - деди жолугушуунун катышуучуларынын бири.

"Жакшы, анда маселеңерди чече ала тургандарга кайрылгыла",- деп залдан министрдин чыгып кеткенин видеодон көрүүгө болот.