Гүл менен конверт тапшырды. Жалал-Абадда сабалган "Тазалыктын" кызматкеринен шаар мэри кабар алды

"Жалал-Абад Тазалык" ишканасынын кызматкери Маргуба Хакимова белгисиз адам тарабынан сабалган. Жабырлануучунун абалынан Жалал-Абад шаарынын мэри 25-декабрда кабар алып, материалдык жардам көрсөттү. Бул тууралуу мэриянын басма сөз кызматынан кабарлашты.

Белгилүү болгондой, Жалал-Абад шаарынын мэри Эрнисбек Ормоков ооруканада дарыланып жаткан аялдын абалы менен таанышып, окуяга укуктук баа берилүүсүнө кызыктар экенин айтты. Аны менен бирге жабырлануучуга материалдык жардамын тапшырды.

Ал эми "Тазалык" ишканасынан Маргуба Хакимованын абалы жакшырып келе жатканын билдиришти.

"Биздин ишкана тарабынан дары-дармек алып берилди. Буюрса, дүйшөмбү күндөн тарта бардык кызматкерлер көңүлүнөн чыккан каражатты чогултуп, кесиптешинин дарылануусуна көмөк көрсөтөт", - дешим аталган мекемеден.

24-декабрда таңга маал Маргуба Хакимованы сабап кетишкени кабарланган. Анда жабырлануучуну таш менен ур-соккуга алган эркек киши милиция кызматкерлери келгенге чейин качып кеткендиги айтылган.

Аталган окуя боюнча сотко чейинки тергөө иштери башталып, тиешелүү экспертизалар дайындалганын Жалал-Абад ОИИБинин маалымат кызматынан билдиришкен.