ЖЫЛ ЖЫЙЫНТЫГЫ-2020: "Коркунуч, белгисиздик, ый, жоготуулар, алсыздык". Коронавирус Кыргыз өлкөсүндө бир көз ирмем менен

2020-жыл тарыхта эң оор жылдардын бири катары эсте калды. Бул, албетте, дүйнөнү желедей каптап, дүрбөлөңгө салып, эң өнүккөн мамлекеттерди дагы чөгөлөткөн коронавирус, илимий аталышы SARS-CoV-2 болгон илдетке байланыштуу. Жер планетасы боюнча жалпы 197 мамлекет болсо, анын баарында тең коронавирус катталды. Акыркылардан болуп 2020-жылдын 22-декабрында коронавирус же COVID-19 Антарктидага дагы жетти.

Бул илдет Кыргыз өлкөсүн дагы кыйгап өткөн жок. Биз үчүн коронавирустун келиши экономикалык, коомдук-саясий жана моралдык жактан оор мезгил болду.

КОРОНАВИРУС ТУУРАЛУУ АЛГАЧКЫ МААЛЫМАТТАР

Кыргыз өлкөсүндө коронавирус тууралуу алгачкы маалыматтар 2019-жылдын декабрь айынын аягында келе бапштады. Бирок анда Кытайдагы сырдуу оору каттала баштаганы айтылган. Анын белгилери сасык тумоого окшош экени жазылган. 9-январда Кытайдын Ухань шаарында жүрүп жаткан сырдуу оорудан оорунун кесепетинен биринчи өлүм катталган. 12-январда сырдуу оору SARS-CoV-2 инфекциясы чакырган коронавирус илдети экени аныкталган.

КЫРГЫЗ ӨЛКӨСҮНДӨ КОРОНАВИРУСКА КАРАТА ЖАСАЛГАН АЛГАЧКЫ ЧАРАЛАР

23-январдан тарта Кытай Эл Республикасы менен аба, унаа жана темир жол каттамдары толук бойдон токтотулуп, бардык көзөмөл-өткөрүү пункттары жабылган.

25-январда Саламаттыкты сактоо министрлигинде коронавирус боюнча абалга көз салуу үчүн атайын штаб түзүлгөн.

Министрлик жарандарга коронавирус боюнча төмөнкү чараларды сунуштаган:

Колду самындап же спирт кошулган каражат менен жууп жүрүү;
Жөтөлгөндө же чүчкүргөндө ооз жана мурунду жабуу;
Грипп же жугуштуу оору менен ооруган кишиге өтө жакындабоо;
Эт жана жумуртканы дыкат тазалоо;
Жапайы жаныбарларды, канаттууларды кармабоо;
Дене табы көтөрүлүп, жөтөлүп жана дем алуу кыйындаса дароо ооруканага кайрылуу керек.25.01

КОРОНАВИРУС ЖУКТУРУП АЛГАН АЛГАЧКЫ КЫРГЫЗ ЖАРАНЫ

18-февралда - 8-февралда Япониядагы "Diamond Princess" кемесинде коронавирус жуктуруп алгандардын арасында Кыргыз жараны бар экендигин чет өлкөлүк басылмалар Япониянын Саламаттыкты сактоо министрлигине таянуу менен жазып чыккан. Кийин бул маалыматты Кыргыз өлкөсүнүн саламаттыкты сактоо министри дагы тастыктаган.

МЕДИЦИНАЛЫК БЕТ КАПТАРДЫН АЗАЯ БАШТАГАНЫ ТУУРАЛУУ ЭСКЕРТҮҮ

26-февралда вице-премьер-министр Алтынай Өмүрбекова дарыканаларда, ооруканаларда бет каптар бар, бирок азайып жатканын эскерткен. 29-февралда SUPER.KG порталы борбордогу дарыканаларга барып "медициналык бет каптар барбы?" деген суроо менен сурамжылоо жүргүзгөн. 10 дарыкананын ичинен ичинен 9унда медициналык бет каптар жок болуп чыккан.

КОРОНАВИРУС КЫРГЫЗ ӨЛКӨСҮНӨ КЕЛГЕНИ ТУУРАЛУУ АЛГАЧКЫ МААЛЫМАТ

2-мартта мессенжерлер аркылуу коронавирус жуктуруп алган адам өлкөгө келгени тууралуу маалымат тараган. Кийин бул маалымат медайым болуп иштеген жаран аркылуу тараганы белгилүү болгон. Министрликтин берген маалыматы боюнча, 27-февралда Түштүк Кореядан Өзбекстан аркылуу Өзгөнгө Кыргыз жараны келген. Ал 14 күндүк карантинге Өзгөн райондук ооруканасына жаткырылган. Ошондон улам медайым аны коронавирус жуктуруп алган деген маалымат таратып жиберген. Медайым WhatsApp`тагы группаларга, курбуларына тамашалап жөнөткөнүн айтып, кийин коомчулуктан кечирим сураган.

КОРОНАВИРУСТУН КЫРГЫЗ ӨЛКӨСҮНҮН ЭКОНОМИКАСЫНА ТААСИРИН ТИЙГИЗЕ БАШТАГАН МЕЗГИЛИ

13-мартта Казакстанда коронавирус катталган. Вирустун коңшу өлкөгө жеткендиги Кыргыз мамлекетиндеги тамак-аш продуктуларына, азык-түлүккө болгон баанын өсүшүнө алып келген. Бишкектеги жана республиканын аймактарындагы базарларда ун, күрүч, кумшекер, май азыктарынын баасы суроо-талапка жараша адаттагыдан жогору боло баштаган.

15-март саат 12:00гө карата Бишкектин Түштүк магистралындагы "Глобус" дүкөнүндө тамак-аш продуктулары коюлган текче дээрлик бош калгандагы учуру.

КОРОНАВИРУС БОЮНЧА БИРИНЧИ "ЧП"

Социалдык тармактар аркылуу "Канададан келген Кыргыз жаранынан коронавирус аныкталып, аны медицина кызматкерлери үйүнөн алып кетишти" деген маалыматтар, сүрөттөр тараган. Интернетке тараган билдирүүгө ылайык, окуя Бишкектеги Көк-Жар кичи районунда орун алганы маалымдаган.

КОРОНАВИРУС КЫРГЫЗ ӨЛКӨСҮНДӨ...

18-мартта саат 09:00дө Өкмөт үйүндө өтүп жаткан жыйында тастыкташты. Саламаттыкты сактоо министри Космосбек Чолпонбаев билдиргендей, алардын тесттеринин жыйынтыгы бүгүн түнү Бишкектен чыкты. Сауд Арабиядан кичи ажылык зыяратынан келген жана коронавирус жуктуруп алганы аныкталган 3 Кыргыз жараны карантинге алынган. Алар 13-мартта умрадан келишкен.

20-март - коронавирус дагы үч жарандан аныкталды. Алар Ноокат районунун тургундары, умра сапарына барып келгендиги белгилүү болду. Учурда изоляцияга алынды. Алар менен 1042 адам байланышта болгон. Жабыркагандар 67, 71 жана 77 жаштагы аялдар. Алар изоляцияга алынды. Вирусту жуктургандар Жидда-Ош каттамы менен 12-мартта учуп келишкен. Алар менен учакта 282 жүргүнчү болгон.

20-март - Бишкек шаарынын тургундары дүрбөлөңгө түшүп, бет кап алуу үчүн узун кезекке тура башташты.

21-март - коронавирус 8 адамдан аныкталды.

ӨЛКӨДӨ ӨЗГӨЧӨ КЫРДААЛДЫН ЖАРЫЯЛАНЫШЫ

Өлкөдө 18-мартта коронавирус аныкталып, 22-марттан тарта республиканын бардык аймактарына 1 айга өзгөчө кырдаал жарыяланган.

ӨЗГӨЧӨ АБАЛДЫН ЖАРЫЯЛАНЫШЫ. КОМЕНДАНТТЫК СААТ

24-мартта - Бишкек, Ош жана Жалал-Абад шаарларынын, Ош облусунун Ноокат, Кара-Суу райондорунун, ошондой эле Жалал-Абад облусунун Сузак районунун аймактарына өзгөчө абал киргизүү жөнүндө чечим кабыл алынды.

25-март саат 08:00дөн тарта 15-апрель саат 08:00гө чейин Бишкек, Ош жана Жалал-Абад шаарларына, Ноокат, Кара-Суу жана Сузак райондоруна өзгөчө абал тартиби киргизилген. Аталган шаарлар менен райондордун аймактарында комендатура түзүлүп, коменданттык саат 20.00дөн 07.00гө чейин киргизилген. Блок-посттор коюлган.

КОРОНАВИРУС МЕНЕН КҮРӨШҮҮ ҮЧҮН АЧЫЛГАН ЭСЕПКЕ АЛГАЧКЫ АКЧАЛАР ТҮШӨ БАШТАДЫ

23-март Коронавирус менен күрөшүү үчүн ачылган эсепке 8 миллион 702 миң сом түштү. Бул тууралуу вице-премьер Эркин Асрандиев онлайн маалымат жыйында билдирди. 24-март - Финансы министрлигинин административдик эсебине 24-мартка карата 11 миллион 300 миӊ сом акча түшкөн маалымдалды. 26-март

Эл аралык валюта фонду коронавирус инфекциясына каршы күрөшүү үчүн Кыргыз өлкөсүнө 120 миллион 900 миң доллар бөлдү. Бул тууралуу чет элдик маалымат булактары жазышкан.

"Бул өтүнүчтү канааттандырып, ЭВФтин аткаруучу кеңеши Кыргыз өлкөсүнө 120 миллион 900 миң доллар бөлүп бермей болду", - деп айтылат маалыматта.

КОРОНАВИРУС АЛГАЧКЫ ЖОЛУ ЖАШЫ ЖЕТЕ ЭЛЕКТЕРДЕ БАЛДАРДА КАТТАЛДЫ.

2020-жылдын 24-мартына карата республика боюнча коронавирус инфекциясын жуктуруп алган дагы 26 адам катталды. Мындан улам Кыргыз өлкөсүндө жалпы 42 адамдан COVID-19 вирусу аныкталды.

6 жаштагы 1 балада – коронавирус инфекциясы аныкталды;

14 жаштагы 1 өспүрүмдө – коронавирус инфекциясы аныкталды;

Калгандарынын жашы – 16дан 86 жашка чейин.

25-МАРТТАН ТАРТА БАРДЫК ИЧКИ АВИАКАТТАМДАР ТОКТОТУЛДУ.

ПНЕВМОНИЯ МЕНЕН ЖАБЫРКАГАН АЛГАЧКЫ БЕЙТАПТАР

26-март - 6 жаран пневмония менен жабыр тарткандыктан жасалма дем алдыруу аппараттарынын жардамы менен дем алып жатканы айтылды. Мындан улам алар жандандыруу бөлүмүндө жатышканы маалымдалган.

ОШЕНТИП БИР АЙДЫН ИЧИНДЕ КОРОНАВИРУС ЖУКТУРГАНДАРДЫН САНЫ...

107ге жетти. Акыркы 2 күн ичинде коронавируска чалдыккан 23 жарандын ичинен төртөө чет өлкөдөн келген. Калгандары өлкө ичинде жуктуруп алгандар болуп саналат. Дагы бир кейиштүү жаңылык - бул илдетке кабылгандардын арасында балдардын саны көбөйүп жатканы.

Биринчи жолу коронавирус Ысык-Көлдө катталып, аталган облустун 2 тургуну илдетти жуктуруп алганы айтылды. Ошентип, Кыргыз өлкөсүндө илдет чыга элек дубандан жалгыз Талас калды.

АПРЕЛЬ АЙЫНЫН БАШЫ МИНИСТРЛЕРДИН КЫЗМАТТАН КЕТИШИ МЕНЕН БАШТАЛДЫ

1-апрелде вице-премьер Алтынай Өмүрбекова жана саламаттыкты сактоо министри Космосбек Чолпонбаев кызматтарынан бошотулуп, алардын ордуна Аида Исмаилова вице-премьер, Сабиржан Абдикаримов саламаттыкты сактоо министри болуп дайындалганы маалым болду.

1-апрелде өлкөдө дагы 4 жарандан коронавирус аныкталды. Ооругандардын саны 111 болуп калды.

КОРОНАВИРУСТАН КАЗА ТАПКАН АЛГАЧКЫ БЕЙТАП

2-апрелде аталган илдеттен улам алгачкы бейтап каза болду. Маркум Ноокат районунун 61 жаштагы тургуну жана кичи ажылык зыяратынан кайтып келгендердин бири экендиги маалым болду.

КОРОНАВИРУС БИРИНЧИ ЖОЛУ МЕДИЦИНА КЫЗМАТКЕРЛЕРИНДЕ АНЫКТАЛДЫ

4-апрель. Кыргыз өлкөсүндө коронавирустан улам алгачкы ооруган адам каза болгондон кийинки кейиштүү кабар 9 медицина кызматкеринин илдет жуктуруп алганы маалым болду. Алардын жетөө Жалал-Абад облусундагы ооруканаларда иштегендер.

5-апрель - Коронавирустан экинчи бейтап көз жумду. Ал Ноокаттык 80 жаштагы жаран болчу.

ЖАСАЛМА ДЕМ АЛДЫРУУЧУ АППАРАТТАРДЫН ЖЕТИШСИЗ БОЛУП ЖАТКАНЫ ТУУРАЛУУ АЛГАЧКЫ ЭСКЕРТҮҮ

11-апрель. Кыргыз өлкөсүндө жасалма дем алдыруу аппараттары жетишсиз болуп жатканын премьер-министр Мухаммедкалый Абылгазиев республикалык ыкчам штабдын жыйынында айтты.

11-апрель Өкмөт башчы бүгүнкүгө карата коронавирус инфекциясына каршы күрөшүүгө 183 миллион 395 миң сом жумшалганын айтты.

НАРЫН ШААРЫНА ЖАНА АТ-БАШЫГА ӨЗГӨЧӨ АБАЛ КИРГИЗИЛДИ

Өлкөнүн айрым аймактарына киргизилген өзгөчө абал 30-апрелге чейин узартылды. Ошондой эле Нарын шаарына жана Ат-башы районуна да 30-апрелге чейин өзгөчө абал киргизилди.

КОРОНАВИРУС ИЛДЕТИНЕ ЧАЛДЫККАНДАРГА КАНЧА СУММА КОРОТУЛГАНЫ АЙТЫЛДЫ

COVID-19 илдетине чалдыккан 165 бейтапты стационарда дарылоого 3 миллион 98 миӊ 824 сом сарпталганы маалымдалды. Ошондой эле коронавирус боюнча обсервацияда көзөмөлдө жаткан 1 миң 794 адамга 5 миллион 264 миӊ 219 сом бөлүнгөнүн кошумчалады.

АПРЕЛЬ АЙЫНЫН СОҢУНА КАРАТА КОРОНАВИРУС ЖУКТУРГАНДАРДЫН САНЫ...

746га жетти. Ал эми каза болгондор 8 адам.

КОРОНАВИРУСТАН УЛАМ КӨЗ ЖУМГАН АЛГАЧКЫ МЕДИЦИНА КЫЗМАТКЕРИ.

2-майда коронавирустан 2 бейтап каза болду. Анын бири №3 үй-бүлөлүк медицина борборунун үй-бүлөлүк дарыгерлер тобунун жетекчиси. экени маалым болду.

МАЙ АЙЫНА КАРАТА КОРОНАВИРУС ЖУКТУРУП АЛГАНДАРДЫН ЖАЛПЫ САНЫ...

1748ге жетти. Ал эми каза болгондор 17 адам.

ИЮНЬ АЙЫНДА ООРУНУ ЖУКТУРУП АЛГАНДАР МЕНЕН АНДАН КАЗА ТАПКАНДАР КӨБӨЙӨ БАШТАДЫ

1-июнга карата өлкөдө дагы 69 адамдан коронавирус аныкталды. Көбү Орусиядан келген курсанттардан тастыкталды.

3-июнга карата өлкөдө коронавирустан дагы 3 бейтап каза болду. Алардын бири дарыгер, экинчиси оор жүк ташуучу унаанын айдоочусу, үчүнчүсү 84 жаштагы карыя.

6-июнь - Кыргыз-Түрк достугунун ооруканасы бейтаптарды кабыл ала баштады.

10-июнь - Өлкөдө бир суткада 38 адамдан коронавирус аныкталды. Жалпы 2093кө жетти.

12-июнь - Москвадагы Жеңиш парадына катыша турган Улуттук Гвардиянын аскерлеринен коронавирус аныкталды.

АЛГАЧКЫ ЖОЛКУ ЭҢ ЖОГОРКУ КӨРСӨТКҮЧ

16-июнь - 100 жарандан коронавирус аныкталды. Бул эң жогорку көрсөткүч болду. Муну менен ооругандардын жалпы саны 2 миң 472ге жетти.

Коронавирустан дагы бир бейтап кайтыш болду. Анын жашы 85те болгон. Өлкөдө илдеттен каза болгондордун саны 28ге жетти.

22-июнь - сутка ичинде 205 кишиден коронавирус илдети аныкталды.

АБАЛ КУРЧУП БАРА ЖАТКАНЫ ТУУРАЛУУ ЭСКЕРТҮҮЛӨР

24-июнда саламаттыкты сактоо министринин орун басары Мадамин Каратаев акыркы аптада коронавирус боюнча абал курчуп кеткенин айтты.

25-июнь - Бир суткада 228 жарандан коронавирус аныкталып, буга чейинки рекордду жаңылады.

ӨЛКӨ БАШЧЫ КОРОНАВИРУСТУН АЙЫНАН ОРУСИЯДА ӨТКӨН ПАРАДГА КАТЫША АЛБАЙ КАЛДЫ

24-июнда президентти Москвага коштоп баргандардын экөөнөн коронавирус аныкталганы үчүн Сооронбай Жээнбеков парадга катышпай калган. 25-июнда Сооронбай Жээнбеков Бишкекке келип коронавируска тапшырган анализи таза чыкты.

АЛ ЭМИ МУРДАГЫ ӨЛКӨ БАШЧЫ ПНЕВМОНИЯГА ЧАЛДЫККАНЫ МААЛЫМ БОЛДУ

30-июнь - мурдагы президент Алмазбек Атамбаев пневмония жуктуруп алганы маалым болду.

ИЮНЬ АЙЫНЫН СОҢУНА КАРАТА КОРОНАВИРУСТАН УЛАМ КАЗА БОЛГОНДОР САНЫ

57ге жетти. 30-июнга карата жалпысынан ооруну жугузуп алгандардын саны 5 миң 296 адамды түздү.

Өткөн суткада коронавирус илдети дагы 7 жарандын өмүрүн алды. Эң улуусу 76, эң кичүүсү 27 жашта болгон. Муну менен өлкөдө аталган оорудан көз жумгандардын саны 57ге жетти.

КОРОНАВИРУСКА КОШУМЧА ПНЕВМОНИЯ КҮЧӨП ЖАТКАНЫ АЛГАЧКЫ ЖОЛУ АЙТЫЛДЫ

1-июль. Бишкекте 700дөн ашуун бейтап пневмониядан дарыланып жатат. Анын ичинен 79 жарандын абалы өтө оор экени айтылды. Бишкек шаарынын аймагындагы мекеме, ишканалардын иштөө тартиби жана коомдук транспорттордун каттамына өзгөртүүлөр киргизилди.

2-июль - Өлкөдө март айынан бери пневмониядан 97 киши каза болгону маалымдалды.

3-июль - Вице-премьер-министр Аида Исмаилова онлайн-брифинг учурунда Саламаттыкты сактоо министрлигинин алдында коронавирус илдети менен күрөшүү үчүн ачылган эсепке түшкөн каражаттардын кайда жумшалганын айтты.

"Бул эсепке физикалык же юридикалык жактардан 139 миллион 975 миң 253 сом түштү. Комиссиянын чечими менен 38 миллион 553 миң сом медкызматкерлердин кошумча маянасы үчүн которулган. Кийин дагы 95 миллион 584 миң сом медицина кызматкерлеринин кошумча төлөмдөрү үчүн жумшалды.

29-майдагы протокол менен 4 миллион 150 миң сом коргоочу каражаттарды, оору менен күрөшүүгө зарыл болгон медициналык буюмдарды алууга коротулду.

Азыркы убакта бул эсепте 1 миллион 581 миң сом бар", деген маалымат берилди.

4-июль - Дары-дармектердин баасынын жогорулашы башталды. Дарыгер-педиатр Абдиманнап Муратов каза болду.

ЖУБАК АЖЫ ЖАЛИЛОВ, ДЕПУТАТ ЧЫНЫБАЙ ТУРСУНБЕКОВ

6-июлдп Жогорку Кеңештин мурдагы төрагасы Чыныбай Турсунбеков пневмониядан улам каза болгон.
10-июлда - Чубак Жалилов түнкү саат 00:00 чамасында ооруканага оор абалда келлип түшкөнү жана ага эки тараптуу пневмониянын оор түрү, кант диабети деген диагноз коюлганы маалыдалды. Чубак ажы 11-июлга караган түнү саат 02:50 чамасында дүйнө салганы кабарланды.

СТАЦИОНАРЛАРГА АЙЛАНГАН ТОЙКАНА, МЕЙМАНКАНАЛАР.

Алгачкы жолу жеке ишкер Базарбай Мусабеков 300 орундуу чайканасын COVID-19 пандемиясынын алдын алуу максатында оорукана катары колдонууга берүүгө даяр экенин жарыялаган. Андан кийин өлкөдө илдет кулая жая баштаганда жеке ишкерлер жана ыктыярчылар тарабынан 15 стационар ачылган.

КЛЕКСАН, ГЕПАРИН...

12-июль. Социалдык тармактарда Клексан, Гепарин, Цефепим, Цефуроксим жана башка вируска каршы дарыларды издегендер көбөйө баштады. Бул дарыларды табуу кыйынчылык жаратып, айрымдары дары-дармектерди чет өлкөдөн алдыртып жаткандарын жазып чыгышкан. Бул арада бул препаратарга болгон баа 2,3 эсе жогорулаган. Айрымдары бир ампула дары үчүн 16 миң сом акча бергенин жазып чыгышты.

ЫКТЫЯРЧЫЛАРДЫН ЧОҢ АРМИЯСЫ

Өлкөдө абал курчуп бейтаптар оорканалардын эшигинин алдында жардам алганга жетишпей каза тапкандар болду. Медицина кызматкерлери бейтаптарды кабыл алганга жетишпей жатты.Мындан улам көбүнчө жаштардан түзүлгөн ыктыярчылар тобу жарандарга жардам бере башташты. Укол сайгандарды билгендери бейтаптарга акысыз эмдөө жүргүзүп, дары-дармекке муктаж болгондорго препарат табууга, аны сатып алууга акча чогултууга жардам беришти. Айрымдары бейтаптарды стационарларга жеткирип жатышты. Дүйнөлүк басылмалар Кыргыз өлкөсүндөгү абалды ыктыярчылар сактап жатканын жаза башташты. Тилекке каршы жаш ыктыярчыларды арасында оор жоготуу да болду.

13-июлда - Бишкекте «Discovery» мейманканасынын базасында пневмония жана коронавирустан ооругандар үчүн ачылган убактылуу стационарда Кыргыз мамлекеттик медициналык академиясынын (КММА) 21 жаштагы студенти Адинай Мурзабекова каза тапты. 15-июлда анын элесине "Эрдик" медалы тапшырылды.

БИШКЕКТЕ КОРОНАВИРУС МЕНЕН ПНЕВМОНИЯНЫН ЖАЙЫЛЫШЫ ТУУ ЧОКУСУНА ЖЕТТИ.

16-июль - Бишкекте 2019-жылдын 1-июлунан тартып 15-июлга чейин жалпы 68 адамдын сөөгү жерге берилген. Ал эми быйыл ушул аралыкта борбор калаада 251 адам жерге берилди. Анын ичинен 86сы пневмониядан, 25и коронавирустан, калганы илдетке байланышы жок көз жумгандар."Согуштагыдай эле абал болуп жатат. Көмгөнгө жетишпей жатабыз". 17 көр даяр турган Бишкектеги көрүстөндөрдүн учурдагы абалы.

БИШКЕКТЕ ТҮНКҮ СТАЦИОНАРЛАР АЧЫЛДЫ.

14-илдан тарта Шаардык ооруканалардагы орундардын жетишсиздигинен улам, түнкү стационар уюштурулду.

Алардын айтымы боюнча, “ДСК” спорт комплексиндеги түнкү стационарда – 120 орун, “Консулда” – 100 орун бар.

ИЮЛЬ АЙЫНЫН СОҢУНА КАРАТА КОРОНАВИРУСТУН АЙЫНАН 1 МИҢ 278 ЖАРАНЫБЫЗДЫ ЖОГОТТУК

31-июль - Өлкө боюнча сутка ичинде дагы 14 жаран коронавирус жана пневмониядан каза болду. Жалпы каза болгондордун саны 1 миң 378ге жетти. Жалпы 35 миң 805.

АВГУСТ АЙЫНЫН СОҢУНА КАРАТА ИЛДЕТ ЖАЛПЫ 43 МИҢ 898 МЕКЕНДЕШ БУЛ ИЛДЕТТИ ЖУКТУРУП АЛДЫ

ООРУ БАСАҢДАГАН КҮЗ АЙЛАРЫ. ОНЛАЙН БИЛИМ АЛУУ

Сентябрь айында коронавируска чалдыккандадрын саны жана андан каза тапкандар азая баштады. Бирок дүйнөдө коронавирустун экинчи толкуну башталат деген чочулоо карантиндик айрым чараларды кайрадан күчөтүүгө туура келди. Алсак мектептер, бала бакчалар жана ЖОЖдор бүгүнкү күнгө чейин аралыктан окутууну улантууда.

БҮГҮНКҮ КҮНДӨ...

2020-жылдын 30-декабрына карата өлкөдө оору жуктуруп алгандардын саны 80 миң 843 адамды түздү. Анын ичинен сакайып чыккандардын саны 75 миң 624. Ал эми каза тапкандар 1 миң 354 адам.

Бүткүл дүйнөлүк саламаттыкты сактоо уюму коронавирус илдетинин жайылуу коркунучу токтогон жок. Ага карата толук кандуу вакцина дагы иштетилип чыга элек. Андыктан коронавируска каршы күрөшүүнүн эң эффективдүү жолу болгон санитардык-гигиеналык эрежелерди сактоону унутпаш керектигин бул уюм эскертип келет.