Өкмөт өкүлү: "Ишкерлерге ар тараптуу колдоо көрсөтүү экономикабыздын өнүгүүсүнө өбөлгө болот"

Өкмөттүн Баткен облусундагы ыйгарым укуктуу өкүлү Жаныбек Жалалов Жаш ишкерлер ассоциациясынын өкүлдөрү менен жолукту. Бул тууралуу өкмөттүн Баткен облусундагы ыйгарым укуктуу өкүлүнүн басма сөз кызматынан кабарлады.

Маалыматка ылайык, анда өкүл ишкерлерди колдой турганын, аларга тиешелүү шарттарды түзүп берүү керектигин белгилеген.

"ЖИАнын алдында 2019-жылы облуста ишкерлерди колдоо борбору ачылып, учурда аталган борбор ишкерлерге юридикалык жана ишкердикти баштоо, өнүктүрүү боюнча акысыз кеңештерди берип, окутууларды уюштуруп келет. 2020-жыл ичинде аталган борборго 700гө жакын кайрылуу болгон. ЖИА буга чейин ишкерлер үчүн форум, бизнес каравандарды жана өлкөнүн башка аймактарында тажрыйба алмашууларды уюштуруп келет.

2020-жылы ЖИА тарабынан ишкердикке кызыккан айымдарды колдоо боюнча долбоор ишке ашып, облуста 24 айым каржылык колдоо алып, ишмердүүлүктөрүн башташкан. Ыйгарым укуктуу өкүл Жаныбек Жалалов, жаш ишкерлер менен жакындан баарлашып, облуста чакан жана орто бизнести өнүктүрүү, ишкерлерге көмүскөдө эмес, расмий иш жүргүзүүнүн артыкчылыктары, Өкмөттүк жана гранттык колдоолор тууралуу, маалымдуулукту жогорулатуу зарылдыгын белгиледи. Ошондой эле биздин аймакта бар сырьёну пайдалануу менен өзгөчө жаңы технологияларды пайдаланып, айыл чарба продукцияларын кайра иштетүү багытында иш алып баруу, натыйжалуу жана пайдалуу болорун айтты", - деп айтылат маалыматта.

ЖИА Баткен облусунда 2016-жылы түзүлүп, учурда 100гө жакын мүчөлөрү бар.