Жогорку Соттун төрайымы: "Юрист эмес, жеке адам катары Садыр Жапаровго куугунтук болгон деген ой болгон"

Юрист катары эмес, жеке адам катары ошол кезде Садыр Жапаровго түрмөдө кол салуу болуп, куугунтук жасалган деген пикирин бүгүн, 29-декабрда Жогорку Соттун төрайымы "Азаттыкка" берген маегинде билдирди.

Анда Гүлбара Калиевага: "Садыр Жапаров ошол кездеги бийликтин саясий курмандыгы деген пикирге кандай карайсыз?" деген суроо узатылган.

"Азыркы талапкер Садыр Жапаровго түрмөдө кол салуу болду деп жеке адам катары шекшидим. Анткени адам өзүнө-өзү кол салбайт туурабы? Мен Жогорку Сотко судья болуп 2012-жылдын сентябрь айында келдим. 2014-жылы өз каалоом менен кеткем. Юрист катары эмес, адам катары укуктук баа бергенде анда иштин материалдарын билиш керек.

Жоопко тартылган адамдар, өздөрү куугунтук болгонун айтса тергөө органдары аныкташы керек. Эгерде куугунтук болсо, анда өздөрү эле кыскартып коюшу мүмкүн. Жаңы ачылган жагдайлар боюнча сотко кайрылса, алар карап, баа бериши керек. Бирок мен судья катары ишти караган эмесмин. Иштин материалдары менен да таанышкан эмесмин" , - дейт Калиева.