Жогорку Соттун төрайымы: "Иш тууралуу белгилүү болгондо президентке кирүүгө аракет кылдым"

Жогорку Соттун төрайымы Гүлбара Калиева УКМК тарабынан айтылып жаткан иш 2020-жылдын апрель-май айларында эле ачылганын "Азаттыкка" берген маегинде билдирди.

Бирок Калиева ага карата иш ачылганын сентябрь айында гана укканын айткан.

"Иш апрель-май айларында башталыптыр. Бирок мага бул тууралуу 21-сентябрда белгилүү болду. Себеби УКМКнын кызматкерлери Сот департаментине караштуу маалыматтык технологиялар боюнча “Адилет сот” мекемесине, Жогорку Соттун аппарат жетекчисине келген. Менин жеке өзүмө УКМКнын кызматкерлери кайрылган эмес, күбө катары дагы чакырган эмес. Айтылып жаткан иш боюнча иштин материалдарын көргөн эмесмин. Жогоруда айткандай, мага 21-сентябрда иш тууралуу белгилүү болгондо, президентке жолукканга аракет кылдым, бирок ал бошогон жок. Ошону менен өзүм да түшүнбөй жүрдүм. Себеби мен долбоор боюнча бир дагы документке кол койгон эмесмин. 2014-жылы Европа биримдиги өзүнүн программасы менен келген. Алар санариптештирүүнүн алкагында долбоор сунуштап, аны өздөрү каржылап, тендер жарыялап, жеңүүчүнү дагы өздөрү аныктаган" , - деди Калиева.

Ошондой эле Калиева бул иш боюнча "Адилет сот" мекемесинин жетекчиси камакка алынганын белгиледи.

"22-октябрда "Адилет соттун" жетекчиси камакка алынды. Менде ошол жетекчинин үн жазуу менен жөнөткөн билдирүүсү бар. Ал билдирүүнү жактоочулары аркылуу окудум. Ал мага каршы көрсөтмө берүү боюнча кысымдар жасалып жатканын айткан экен. Басым УКМКнын кызматкерлери тарабынан жасалып жатканын айткан. Мүмкүн ошол басымдардан кийин мага карата каршы көрсөтмө берүүгө аргасыз кылды.Себеби ошондон кийин ал камактан чыгарылды" , - деди Калиева.

Эске салсак, 24-декабрда УКМКнын төрагасы Камчыбек Ташиев Жогорку Соттун төрайымы Гүлбара Калиевага карата кылмыш иши ачылганын ачыктаган. Камчыбек Ташиев Калиева IT компания менен жасалма келишим түзүп, мамлекетке 8 миллион сом зыян келтирүүгө шектелип жатканын жана бул иш тартип комиссиясы тарабынан караларын айткан.