Арстан Алай: "Дүйнө эли кыргызга карыз"

29-декабрда Коомдук телерадио корпорациясында президенттикке талапкерлердин дебаты болуп өттү. Ага Мыктыбек Арстанбек, Эльдар Абакиров, Арстанбек Абдылдаев (Арстан Алай) жана Имамидин Ташов катышты. Ал эми Садыр Жапаров жана Рашид Тагаев келген жок.

Талапкерлер алып баруучулар тарабынан берилген суроолорго жооп берип, андан кийин бири-бирине суроо узатышты.

Арстан Алай өз кезегинде, тышкы карыздан кутулуу жолдору тууралуу кеп козгоду.

"Ар бир мамлекеттин, ар бир улуттун өзүнүн миссиялары бар. Ал миссиялар бузулса ар кандай кырсыктар орун алат. Бул кудайдын эскертүүсү. Жакында Жетим-Тоо боюнча сөз болду. Ааламдан мындай берилет: кыргыз экологияны коргоого алмайынча эч качан экономикасы өнүкпөйт. Кыргыз жергесине 1998-жылдан баштап ааламдан нур төгүлдү. Мына ошол нур төгүлгөн жерди казып, ар кимге сата берсек кыргыз мамлекетинде жоготуу болот. Оору каптайт. Керек болсо мамлекет жоюлуп кетиши мүмкүн. Ошондуктан биз биринчи орунда экологияны коргоого алышыбыз керек. Садыр Жапаров 5 жылда карыздан куткарам деп айтыптыр. Ал 5 жылда жада калса пенсия бере албай калат. Биз дүйнө элин куткарып, өз миссиябызды аткарган кезде каражаттуу мамлекеттер касиеттүү кыргызды каржылайт.

Сырткы карыз азыр кыргыз элинин башын оорутуп жатат. Мен карызды 1 эле шарт коюп туруп чечип коём. Ааламдан берилген белгиде Америка эли табиятты, Орусия эли адамзатты сактоо үчүн күрөшүш керек деп айтылат. Ааламдан илим түшкөндөн кийин, кудай аны жеткире турган адамды кошо жаратты. Сен жеткирүүчүсүн, сен кудайсын, дүйнөнү сотто, сенин айтканың орундалат деп мени жаратты. Мен өз миссиямды аткарып жатам. Ошондуктан эртең Кытай карызын кечпесе мен ачык айтып эле аларды чыгымга дуушар кылып коём. Сырткы карыздан бизге көйгөй болбойт. Тескерисинче дүйнө эли кыргызга карыз деп айтам. Анткени дүйнө эли кырсыктан жанын сактай албай калат. Аларды кыргыз гана куткарып кала алат. Менин президенттикке баратканымдын себеби кыргыз элин дүйнөгө таанытуу, адамзатты сактап калуу", - деди Арстан Алай.