Мектептерде жыныстык маданият сабагы киргизилеби? Күн ичинде орун алган саясий кабарлардын топтому бир шилтемеде

Бүгүн, 30-декабрь, күнгө шаршемби. Күндөгүдөй эле бул күн да саясий окуяларга, жаңылыктарга бай болду. Алардын баарынан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.

Сооронбай жана Асылбек Жээнбековдордун үстүнөн Башкы прокуратурага арыз келип түштү

Экс-президент Сооронбай Жээнбековду жана анын иниси, Жогорку Кеңештин депутаты Асылбек Жээнбековду жоопкерчиликке тартууну талап кылган арыз Башкы прокуратурага келип түшкөнүн аталган мекеменин басма сөз кызматынан тастыкташты.

Белгилүү болгондой, арызды Ош облустук Ички иштер башкармалыгынын мурдагы жетекчиси Абдилат Капаров президенттин милдетин аткаруучу Талант Мамытовдун, УКМКнын төрагасы Камчыбек Ташиевдин жана Башкы прокурор Курманкул Зулушевдин атына жазган.

"Арыз кечээ, 29-декабрда келип түштү. Анда мурдагы президент менен инисинин мүлктөрүн камакка алуу, аларды өлкөдөн чыгуусуна тыюу салуу жана Сооронбай Жээнбековду экс-президент макамынан ажыратуу талабы коюлган. Арыз мыйзамда белгиленгендей 14 жумушчу күндүн ичинде каралат", - деди басма сөз катчы.

Бул арада экс-президент Жээнбеков өзүнүн коомдук фонду түзүлгөнүн кабарлады. Коомдук фонд декабрь айынын башында катталып, негизги максаты - коомдун руханий, маданий жана илимий деңгээлин жогорулатууга көмөктөшүү, өлкөнүн өнүгүүсүнө багытталган жаратман демилгелерди колдоо.

Жогоруда белгиленген максаттарды ишке ашыруу үчүн фонддун ишмердүүлүгү социалдык, маданий, кайрымдуулук жана өлкө үчүн пайдалуу дагы башка иштерди жүргүзүүгө багытталат.

Вице-премьер-министр мектептерге жыныстык маданият сабагын киргизүү керектигин айтты

Вице-премьер-министрлер Эльвира Сурабалдиева жана Максат Мамытканов үй-бүлөлүк зомбулукка каршы күрөшүү жана анын алдын алуу маселеси боюнча кеңешме өткөрдү.

Бул тууралуу өкмөттүн басма сөз кызматы кабарлады. Белгиленгендей, 2020-жылдын 11 айында Кылмыштардын жана жоруктардын бирдиктүү реестринде үй-бүлөлүк зомбулуктун 8337 окуясы катталган, бул 2019-жылга салыштырмалуу 909 окуяга көп жана үй-бүлөлүк зомбулуктун алдын алуу алкагында мектептерде социалдык педагог кызматы киргизилген.

Эмгек жана социалдык өнүктүрүү министринин орун басары Улан Маматкановдун маалыматына ылайык, республика боюнча 470 комитет түзүлгөн, анын катарында үй-бүлөлүк зомбулукту жоюу маселесинин үстүндө иш алып барган кризистик борборлор бар.

Максат Мамытканов тармактык министрликтердин маалыматын угуп, кабыл алынып жаткан чаралардын натыйжасы жетишсиз болуп жаткандыгын белгиледи.

"Мисалга, жабыркаган жактар үчүн түз байланыш бар, бирок алардын номурун көпчүлүк билбейт. Бул калктын маалыматы начардыгынан кабар берет. Балким, ал номурларды бириктирип, үймө-үй кыдырып, аларды тургундарга таркатуу керек. Ал номурларды тез жардам, же милициянын номуру сыяктуу эле ар бир жаран жатка билүүсү зарыл", - деп белгиледи Мамытканов.

Мындан сырткары ал үй-бүлөлүк зомбулукка каршы күрөшүүдө алдын алуу иштерин күчтөндүрүү тапшырмасын берди.

"Жаңы жыл майрамдары алдында туугандарынын камкордугуна алынган эмгек мигранттарынын балдарына өзгөчө көңүл буруу зарыл. Алар тобокелдик катмарында турат. Биз ар бир бала көзөмөлүбүздө болуусуна күч -аракетибизди жумшообуз керек. Кырсык орун алган соң коңгуроо какпастан, алдын алуу иш-чараларына басым жасоо зарыл", - деп жыйынтыктады Мамытканов.

Эльвира Сурабалдиева үй-бүлөлүк зомбулуктун алдын алуу маселесин комплекстүү кароо керек экендигин кошумчалады.

"Учурда мектеп программасына жыныстык маданият сабагын киргизүү керек. Жаш муун туура маалымат алуусу зарыл. Балдар Интернет тармагына эркин жеткиликтүүлүккө байланыштуу ишенимсиз булактардан ар түрдүү маалыматтарга ээ болушат. Белгилүү чыпкалардын жоктугунан 15 жашар өспүрүмдөр порнографиялык материалдарга жеткиликтүүлүк ала алат. Бул маселени чечүү керек", - деди Сурабалдиева.

Балбак Түлөбаевдин маалымат жыйыны өттү

Бишкектин мэринин милдетин аткаруучу Балбак Түлөбаев жыл жыйынтыгын чыгарып маалымат жыйын берди. Жыйында ал бир топ маселелер боюнча кеп козгоп, алдыдагы пландары менен бөлүштү.

Түлөбаевдин айтымында, Бишкектеги абанын булганышы көмүргө байланыштуу. Андыктан ишканалардын баарын газга өткөрүү зарыл.

"Көмүрдү азайтсак эле аба тазарат. Бишкектеги ишкананын баарын, унааларды газга өткөрөбүз. Бишкекке газ менен иштеген коомдук унааларды алып келе жатам. Кара-Кеченин көмүрүн шаарга киргизбей коюуну пландап жатабыз. Анткени ал бышпаган чийки көмүр экен", - деди Түлөбаев.

Мэрдин милдетин аткаруучу Бишкекте курулуусу пландалып жаткан бульвар тууралуу да оюн айтты. Калаа башчынын пикиринде, 120 миллион долларды бульвар курууга короткондон көрө, ден соолугунун мүмкүнчүлүгү чектелген жарандарга жардам берүү оң.

"Бульварды салышыбыз керек. 120 миллион долларга бульвар салгандан көрө башка пайдалуу иш кылсакпы деп турабыз. 7 аялуу жаранга батир бердим. Тоголок жетимдер, ден соолугунун мүмкүнчүлүгү чектелген адамдар бар. Жакында бул боюнча жыйынтыкты айтам", - деди Түлөбаев.

Маалымат жыйынды толугу менен ушул шилтеме аркылуу өтүп көрсөңүз болот.