Мектеп программасына жыныстык маданият сабагын киргизүү туурабы? Эльвира Сурабалдиеванын көтөргөн демилгеси боюнча пикирлер

30-декабрда вице-премьер-министр Эльвира Сурабалдиева мектеп программасына жыныстык маданият сабагын киргизүү керек деген сунушун айтты. "Жаш муун туура маалымат алуусу зарыл. Балдар Интернет тармагына эркин жеткиликтүүлүккө байланыштуу ишенимсиз булактардан ар түрдүү маалыматтарга ээ болушат. Белгилүү чыпкалардын жоктугунан 15 жашар өспүрүмдөр порнографиялык материалдарга жеткиликтүүлүк ала алат. Бул маселени чечүү керек", - деп билдирген Сурабалдиева.

Бул демилгени азыркы тапта социалдык түйүндүн колдонуучулары кызуу талкуулап жатышат. Биринчи жоон топ Сурабалдиеванын пикирин колдогондор болсо, экинчи топ анын пикирине каршы чыккандар. Мындан улам SUPER.KG порталы жарандардын пикирин укту.

Журналист, коомдук ишмер Сымбат Максүтова:

"Буга чейин деле бул маселе айтылып келген. Негизи ойлонуп көрсөк Эльвира Сурабалдиеванын айткан пикиринин негиздүү жактары бар. Себеби ал депутат болуп турган учурда көп жолу кыз-келиндердин зордук-зомбулукка кабылганы тууралуу семинарларга катышып жүрдү, долбоорлордо иштеди. Ошондуктан мен анын демилгесин айласы кеткенден айтты деп ойлойм.

Мурун бир дарыгер ушул демилгени көтөрүп чыкканда азыркыдай социалдык тармак өнүгө элек болчу. Азыр балдар бойго жете электе эле интернеттен баарын көрүп алып жатканы жалган эмес.

Балдар жөн эле сексуалдык сүрөттөрдү көрбөстөн алар порнографияны көрүп жатышат. Ошондуктан Сурабалдиеванын демилгесин мен колдоп, анын программасын максаттуу түзүп чыгыш керек деп эсептейм", - деди Максүтова.

Эл агартуунун отличниги, пенсионер мугалим Ташбү Каразакова:

“Алгачкылардан болуп жыныстык маданиятты окутуудан мурда мектепте адеп, ыйман сабактарын тереңдетип окутуу талапка ылайык. Окуучуларды алгач адептүүлүккө, ыймандуулукка жана тазалыкка окутушубуз керек. Аларды окутпай туруп эле дароо автоматтык түрдө жыныс маданиятын окутуу бул туура эмес. Балким, Европаны тууроо максат болуп жаткандыр, бирок биз кыргызбыз. Кыргыздын каада-салтын, нукура кыргыздын сезимин мектептин окуучусуна жеткиришибиз керек. Алар уят дегенди билиши керек. Илгери биз окуган мезгилде “женсовет” болчу эле.

Ошондо мектептеги алдыңкы эжекелер кирип 9-10-класстын окуучуларына башка, 7-8-класстын окуучуларына башка, 5-6-класска өзүнчө сабак өтчү эле. Муну менен мен министр айымыбыздын сунуштаган пикирине кошула албай турганымды билдиргим келет. Андан көрө үйдө ата-эне кызына, баласына тарбия айтканы туура. Жыныстык маданият дегенде кандайдыр сырдуу аралык болуш керек.

Былтыр музейге аялдардын ич кийимин илип коюшту эле, быйыл жыныстык маданиятты мектепке киргизебиз деп жатышат. Макул аны окуткандан кийин кандай болот экен деп практикалап көрүшсө эмне болот? Бул жол менимче, таза адамды да бузулууга азгыра турган жол болуп калышы мүмкүн. Балдар деген жазыла элек ак барак, ал баракка эмне жазса, ал ошол боюнча калыптанып калат”, - дейт Каразакова.

Журналист, Бактыгүл Султаналиева:

“Кечээ вице-премьер министр Эльвира Сурабалдиева мектептерде 7-8-9 жана 11-класстарга кыздар арасында жыныстык репродукция боюнча курс өтүлүшү керек деген пикирин билдирди. Албетте, бул бир четинен алып караганда туура жана туура эмес деп да айтууга болот. Коомчулук арасында көпчүлүгү жыныстык маданият жөнүндө маалыматтарга ээ эмес, ошол себептен бойдон алдыруулар болуп жатат деген пикирлер бар. Бирок мен ал пикирлерге кошулбайм.

Чынында маселенин өзөгү анда эмес, башкада болуш керек. Мектепке ушундай курстарды киргизип маалымттарды же сабактарды окутуу менен бул нерсе чечилет деп ойлобойм. Эгер ушул жол менен чечилет десек, анда маселе эчак эле чечилип калмак. Себеби бул 10 жыл мурун эле мектепке кирген программа. Мурун мектепте бул тармак боюнча сабактар өтүлүп, дарыгерлер келип кыздарга лекцияларды өтчү. 9-классты мисалга алсак, алар өспүрүм, өткөөл куракта болгондуктан, өтүлгөн сабактар окуучулардын кызыгуусун жараткан учурлар болот. Анда жыныстык каражаттар, катнаш болуп калса сактануунун жолдорун көрсөтүп жатышты. Менимче булар тууралуу айтуу мектеп курагында эрте.

Ошондуктан бул маселени ата-энелер мугалимдер менен биргеликте талкуулап, чечиши керек жана эки тарап тең жоопкерчилик алуусу шарт. Ата-энелер балдары, кыздары менен ачык сүйлөшүп, тарбия-таалим иштерин берип турушса жакшы. Мугалим класстык саат өтүп, бул маселени туура нукка бура алат деп ойлойм. Ошол эле учурда эркек балдарды да тарбиялаш керек. Бул айткандарым менен мен жыныстык маданият боюнча сабактын мектеп программасына киргизилиши маселени чечерине кепилдик эмес дегенди айткым келет”, - дейт Султаналиева.