4 мезгилдеги ажайып көркөмдүк, айылдагы жай турмуш... Зафер Динчер 2020-жыл ичинде тарткан сүрөттөрдүн топтомун чыгарды

Сүрөтчү Зафер Динчер 2020-жыл ичинде тарткан сүрөттөрүнүн ичинен социалдык тармактарда эң көп лайк топтогон сүрөттөрдүн топтомун чыгарды. Анда Кыргыз өлкөсүнүн ар кайсы аймактарында тартылган көз жоосун алган жаратылыш, карапайым калктын жай турмушу, көк бөрү оюнундагы курч кадрлар, 4 мезгилде тартылган көркөм сүрөттөрдү көрүүгө болот. Сүрөтчү социалдык тармакка жарыялаган сүрөттөрдүн алдына кыргыз элине ыраазычылык билдирип, Жаңы жыл майрамы менен куттуктаган.

Сүрөтчү жана мугалим Зафер Динчер Германияда төрөлүп, Түркияда өскөн. Окуу жайын дагы Түркияда бүткөнүнө карабай, Кыргыз өлкөсүндө 16 жылдан бери жашап, иштейт.

"Камеранын жардамы менен Кыргыз өлкөсүнүн булуң-бурчундагы топурагын бастым, суусун ичтим. Айылдагы адамдар менен тааныштым. Алар мени тааныбаса да төрүнө өткөрүп, ысык чайы, наны менен сыйлашат", - деген ал Super.kg порталына берген маегинде.