Билим берүү министрлиги: "2021-2022-жылы Кытайда бюджеттик негизде окууга Кыргыз өлкөсүнө 8 орун берилди"

Билим берүү жана илим министри Алмазбек Бейшеналиев Кытай Эл Республикасынын Кыргыз өлкөсүндөгү атайын жана ыйгарым укуктуу элчиси Ду Дэвэнь айымды кабыл алды. Бул тууралуу аталган мекемеден билдиришти.

Маалыматка ылайык, жолугушууда негизинен Кыргыз жарандарына Кытайдын жогорку окуу жайларында окуу үчүн бөлүнүүчү орундар (квоталар) талкууланды.

"Эки өлкөнүн ортосундагы билим берүү тармагындагы кызматташтык тууралуу макулдашуунун негизинде Кыргыз өлкөсүнүн жарандарына Кытайдын ЖОЖдорунда окуу үчүн орундар (квоталар) бөлүнүп келген. Эми Шанхай кызматташтык уюмуна мүчө өлкөлөрдүн өкмөттөрүнүн ортосундагы билим берүү боюнча кызматташуу тууралуу макулдашууга ылайык, жыл сайын Кыргыз жарандарына Кытайдагы ЖОЖдордо бюджеттик негизде окуу үчүн орундар берилет. 2021-2022-окуу жылына карата Кыргыз өлкөсүнө 8 орун берилди", - деди Ду Дэвэнь.

Жолугушуунун жүрүшүндө Алмазбек Бейшеналиев билим берүү тармагында эки тараптуу мамилелердин бекемделиши боюнча бир нече сунуштарды демилгеледи:

• Кыргыз-Кытай илимий фондун түзүү;
• Окутуучулар арасында академиялык мобилдүүлүктү өнүктүрүү;
• Баштапкы кесиптик билим берүүнү өнүктүрүүдө эки өлкөнүн кызматташтыгы.

Ду Дэвэнь айым бардык демилгелерди колдоп, аларды ишке ашырууну КЭРдин тиешелүү ведомстволору менен талкуулоого даярдыгын билдирди.