Ош шаарынын борбордук аянтынын майрамдан кийинки абалы талкууга алынууда. Мэрия 2 жүк ташуучу унаа толо таштанды чыгарды

Социалдык тармактарда Ош шаарынын борбордук аянтынын майрамдан кийинки абалын көрсөткөн видео тарады. Анда аянтта толо таштанды жатканын көрүүгө болот.

Социалдык тармактардын колдонуучулары мындай абалды сынга алып, шаар тургундарын тазалыкты сактап, таштандыны атайын урналарга салууга чыкырышууда.

Ош мэриясынын басма сөз катчысы Азамат Абсаттаров SUPER.KG порталына учурда борбордук аянт толугу менен тазаланганын билдирди.

"Аянт таң эрте эле тазаланган. "Тазалык" ишканасынын кызматкерлери 20 куб, башкача айтканда 2 жүк ташуучу унаа толо таштанды чыгарды. Таштандынын көпчүлүк бөлүгү желим бөтөлкөлөр, тамак-аштардын калдыктары жана резина шарлар.

Таштанды толуп кетпесин деп чакан урналардан сырткары атайын чоң контейнерлер орнотулган эле. Бирок, өзүңүздөр көргөндөй эл таштандыларды жолго таштап кетишиптир", - деди Абсаттаров.