Бишкектик тургун түтүн каптаган абадан арылуу үчүн айдоочуларды унааларын кезек-кезеги менен айдап туруусун сунуштады

Бишкектин түтүн каптаган абасын тазартуу үчүн айдоочулар унаасын шаарга кезек-кезеги менен айдап чыгып турса болот. Мындай сунуш "Бишкек бүгүн" телеграм каналында жазылды.

Сунуш берген Бишкектик тургун мындай тажрыйба чет мамлекеттерде колдонулуп келерин айткан.

"Калаабызды каптап турган түтүн Бишкектин негизги көйгөйлөрүнүн бири. Бул булганган аба менен биздин балдар, ата-энелерибиз жана жакындарыбыз дем алат. Медиктердин айтуусу боюнча түтүн аралашкан аба ден-соолук үчүн коркунучтуу. Бул маселени чечүү үчүн биз ЖЭБдин ишин токтото албайбыз. Анткени ал жалпы шаар боюнча жылуулук таратат. Жеке турак-жай ээлерине да көмүр жакпа деп айта албайбыз. Анткени бул ыкма көпчүлүгү жылынуунун жалгыз жолу.

Карантин маалында шаарда аба бир топ тазарган. Анткени шаарда унаалар азайган. Түтүн маселесин чечүү үчүн кандайдыр бир токтомдун же мэриянын буйругунун деле кереги жок. Болгону шаарга чыккан автоунаалардын санын азайтууга аракет жасашыбыз керек. Дүйнөнүн кээ бир мамлекеттеринде айдоочулар мамлекеттик номурунун жуп же так сандар менен аяктаганына жараша айдын жуп же так күндөрүндө гана унаа айдап чыгышат. Мисалы 3-январда унаасынын мамлекеттик номуру так сан менен аяктаган айдоочулар гана шаарга чыгышат. Менин сунушумду колдоп, шаарыбыздын көйгөйүн чечүүгө аракет жасап көрөлү" , - деген сунуш ээси.