Ички иштер министринин орун басары түштүк аймактагы милиция кызматкерлеринин шайлоого даярдыгын текшерди

Ички иштер министринин биринчи орун басары Сүйүн Өмүрзаков түштүк жергесинде жергиликтүү милициянын шайлоо өнөктүгү учурундагы коомдук коопсуздукту сактоо чараларын текшерип, жыйын өткөрдү. Бул тууралуу ИИМдин басма сөз кызматынан билдиришти.

Маалыматка ылайык, ички иштер министри Улан Ниязбековдун тапшырмасы менен анын биринчи орун басары Сүйүнбек Өмүрзаков кызматтык иш сапары менен Ош шаардык, Ош жана Жалал-Абад облустук ички иштер башкармалыктарынын жетекчилиги жана өздүк курамы менен жолугушуп, жыйын өткөрдү. Анда президенттик шайлоодо жана шайлоого чейинки үгүт иштери учурунда коомдук тартипти жана коопсуздукту камсыздоо маселелерин текшерүүгө алып, аталган маселеге байланыштуу жергиликтүү милиция жетекчилери менен чогулуш өткөрүп, учурдун маанилүү маселелерин талкуулады.

"Шайлоо учурунда Ош шаардык, Ош жана Жалал-Абад облустук милициянын жетекчилик курамына шайлоо тилкелеринде күзөттү күчөтүү жана ар кандай тартип бузуулар боло турган болсо өз убагында мыйзам чегинде ыкчам чараларды көрүү керектигин да белгилеп, коомдук тартиптин сакталышы боюнча кошумча тапшырмаларды белгиледи", - деп жазылат маалыматта.