Билим берүү жана илим министрлигине 56 миң 647 литр антисептикалык каражаттар тапшырылды

Билим берүү жана илим министрлигине ЮНИСЕФ уюму тарабынан 56 миң 647 литр суюк самын тапшырылды. Каражаттар мектеп жана мектепке чейинки билим берүү уюмдарынын ачылышында көмөк көрсөтүү жана коронавирустун жайылышын алдын алуу максатында берилген. Бул тууралуу аталган министрликтен билдиришти.

Билдирүүгө ылайык, министрлик суюк самын каражаттарын райондук билим берүү бөлүмдөрү аркылуу өлкөдөгү мектеп жана мектепке чейинки билим берүү уюмдарына жөнөтөт.

"Билим берүү жана илим министрлигине 56 миң 647 литр суюк самын каражаттарын бергенибизге кубанычтабыз. Каражаттар Кыргыз өлкөсүндөгү мектеп жана мектепке чейинки билим берүү уюмдарынын коопсуз ачылышы үчүн профилактикалык иштерди жүргүзүү жана вируска каршы күрөшүү үчүн колдонулат", - деди ЮНИСЕФтин билим берүү жана саламаттыкты сактоо бөлүмүнүн башчысы Геррит Маритц.

ЮНИСЕФ уюму - Бириккен улуттар уюмунун алдында эл аралык уюм. Ал экинчи дүйнөлүк согушта жапа чеккен балдарга колдоо көрсөтүү үчүн ачылган. Уюм 1965-жылы дүйнөлүк "Нобель" сыйлыгы менен сыйланган.