Таластагы газ баллондун жарылуусунан жабыркаган эки адам Бишкекке алып келинет

Кыргыз Республикасынын саламаттыкты сактоо министри Алымкадыр Бейшеналиев Талас районундагы жарылуудан жабыркагандар боюнча консультация өткөрдү. Бул тууралуу мекеменин маалымат кызматынан кабарлады.

Маалыматка ылайык, бүгүн, 6-январда саламаттыкты сактоо министри Алымкадыр Бейшеналиев Талас облусунда иш сапары менен барган.

"Сапардын жүрүшүндө министр Кара-Буура аймактык ооруканасында жана Талас облустук бириккен ооруканасында болуп, ден соолугунун абалы, газ баллондун жарылуусунан жабыркаган бейтаптарды дарылоонун тактикасы менен таанышты.

Министр менен кеңешкенден кийин Талас облустук ооруканасында жандандыруу бөлүмүндө жаткан эки жабырлануучуну андан ары дарылоо үчүн Бишкек шаарына которуу чечими кабыл алынды", - дешти мекемеден.

4-январда Талас облусунун Кызыл-Адыр айылындагы "Шаурма сити" тез тамактануучу жайынан газ баллон жарылып, өрт чыккан. Анда 11 адам жабыркаганы айтылган.