Бишкек шаарынын вице-мэринин апасы дүйнөдөн кайтты. Ал медицина тармагында 20 жылдан ашык эмгектенген

Бишкек шаарынын вице-мэри Азамат Сагындык уулунун апасы узакка созулган оорудан улам көз жумду. Ал медицина тармагында 20 жылдан ашык эмгектенген, тажрыйбалуу дарыгер болгонун шаардык мэриядан билдиришти.

Жунушова Жамийла Жумабековна 1958-жылы Нарын облусуна караштуу Жумгал районунун Кайырма айылында туулган. Төрт баланын апасы.

Эмгек жолун Жумгал райондук ооруканада физиотерапия бөлүмүндө иштөө менен баштаган.

Жунушова Жамийла өз кесибин сүйгөн, ишине так, кесипкөй, жоопкерчиликтүү дарыгер катары таанылган.

Дарыгердин ишмердүүлүгү жөнүндө макалалар жазылып, эл арасында Жамийла Жунушова "дарысыз айыктырган дарыгер" деген атка конгон.

Бейтаптын жүрөгүнөн орун тапкан, кесиптештеринин арасында кадыр-баркка ээ инсан болгон.

Кесипкөйлүгү үчүн бир нече жолу ардак грамота жана медалдар менен сыйланган.

Бишкек шаарынын мэриясы Азамат Сагындыковичке, үй-бүлөсүнө, жакындарына терең кайгыруу менен көңүл айтып, аза кайгысын тең бөлүшөт.