Кыймылдаткычы бузулбаган заманбап 5 унаа аталды. Эң кызыгы тизмеге Ауди унаасы кирген жок (рейтинг)

Автоунаа тетиктерин жеткирүү жана диагностикалык жабдууларды чыгаруу боюнча дүйнөдөгү ири компаниялардын бири болгон CarMD компаниясынын эксперттери кыймылдаткычы (мотор) эң ишенимдүү болгон унааларды атады.

Эксперттер кардарлардын суроо-талаптары боюнча 1996-жылдан 2020-жылга чейинки чыгарылган 20 миллиондой унааны изилдеп чыгышкан. Изилдөө 2019-жылдын октябрь айынан 2020-жылдын сентябрь айына чейин жүргүзүлгөн.

Изилдөөнүн жыйынтыгына ылайык, Mitsubishi унааларынын кыймылдаткычы эң аз бузулары белгилүү болгон. Экинчи орунга Mercedes-Benz унаалары жайгашса, германиялык Volkswagen компаниясы чыгарган унаалар үчүнчү орунга жайгашты. 4-5-орунду Ford жана Mazda унаалары ээлеген.

Ал эми унаанын моделине алып караганда кыймылдаткычы эң ишенимдүү делип 2018-жылкы Toyota Tacoma унаасы табылган. Экинчи орунга 2015-жылы чыгарылган Honda CR-V унаасы жайгашса, үчүнчү орунду 2018-жылы чыгарылган Toyota Camry унаасы ээледи.

Мындан тышкары, оңдоо үчүн эң аз каражатты талап кылган кыймылдаткычтар KIA, Chrysler жана Mazda унааларынын кыймылдаткычтары болгон.