Дональд Трамп Байдендин инаугурациясына катышуудан баш тартты

АКШнын президенти Дональд Трамп Жо Байдендин инаугурациясына катышуудан баш тартты. Бул тууралуу Трамп өзү социалдык тармактагы баракчасы аркылуу билдирген.

"Сурап жаткандардын баарына айтам, мен 20-январдагы инаугурацияга барбайм" деп жазган ал Twitter'деги баракчасына.

Айрым дүйнөлүк басылмалардын маалыматына караганда, Трамп 19-январь күнү резиденциядан чыгып Флоридага кетет. Мындай кадам менен Дональд Трамп АКШнын тарыхындагы анын ордуна келе турган адамдын ант берүү салтанатына катышпаган төртүнчү президент болот.

Эске салсак, 7-январга караган түнү Вашингтондо Трамптын тарапташтары Капитолийди басып алып, полиция менен башаламандык уюштургандардын ортосунда кагылышуу болгон. Анын кесепетинен төрт адам каза тапкан. Ал эми 7-январда АКШнын Конгресси демократ Жо Байденди президент кылып бекиткен.