Улукбек Кочкоров: "Акылыбызга келели, дагы бир революция мамлекетти жок кылып жибериши мүмкүн"

Президенттикке талапкер Улукбек Кочкоров Бишкек шаарындагы Биринчи Май районунда жайгашкан №1208 шайлоо участогунда добуш берди. Ал шайлоо тууралуу ойлору менен бөлүшүп өттү.

"Буга чейин административдик ресурсту колдонуу 3 революцияга алып келди. Кыргыз өлкөсүндө дагы бир революция мамлекетти жок кылып жибериши мүмкүн. Ошондуктан акылыбызга келели. Бийлик төбөлдөрүнө, жер-жерлердеги бийлик органдарына кайрылып кетер элем, элдин каалоосуна коюп таза шайлоо өткөрүп берели. Анан дагы бир нерсени айтып өтүү керек. Шайлоо участокторунда көйгөй жок, ал нерсе шайлоо участкасынын сыртында болуп жатат. Бул ошол эле административдик ресурс, добуш сатып алмай, коркутмай, мындай көрүнүштөрдү токтотуш керек.

Бүгүн чыныгы эл үчүн ак кызмат кыла турган жетекчи шайланат деген толук ишеничим бар", - деди Кочкоров.

Белгилей кетсек, бүгүн, 10-январда өлкөдө кезексиз президенттик шайлоо жана референдум өтүп жатат.