"Бүгүнкү күн өтө жооптуу күн". Баткен шаарынын мэри добуш берди

Баткен шаарынын мэри Мамыржан Рахимов жарандык милдетин аткарып, Баткен шаарындагы №8074 шайлоо участкасында добуш берди. Бул тууралуу шаардык мэриянын басма сөз кызматынан билдиришти.

Билдирүүгө ылайык, калаа мэри бүгүнкү күн өлкө үчүн тарыхый жана өтө жооптуу күн экенин айтып өттү.

"Урматтуу шайлоочулар, бүгүнкү күн өлкө үчүн тарыхый жана өтө жооптуу күн. Андыктан ар бириңиздерге татыктуу талапкерди тандап алууну каалайбыз. Бул күнү ар бирибиз тартипти, санитардык талаптарды сактоо менен, шайлоого активдүү катышып, тынч жана ийгиликтүү өтүүсүнө салым кошолу. Шайлоонун жыйынтыгы, өлкөгө, элге пайда алып келген болсун. Мамлекетибиз өсүп-өнсүн, заманыбыз тынч болсун", - деген шаар мэри Мамыржан Рахимов.

Пандемияга байланыштуу шайлоо тилкелеринде жарандардын саламаттыгы үчүн санитардык-эпидемиологиялык коопсуздукту камсыз кылуу боюнча бардык тийиштүү шарттар түзүлгөн. Баткен шаарында 10 шайлоо участкасы, 15 миң 595 шайлоочу бар.

Белгилей кетсек, бүгүн, 10-январда өлкөдө кезексиз президенттик шайлоо жана референдум өтүп жатат.