Тилек Токтогазиев: "Кыргыз өлкөсүнүн Кытайга 60 тонна этти экспорттоого мүмкүнчүлүгү бар"

Кыргыз өлкөсү Кытай менен макулдашуу түзсө, күнүнө 60 тоннага чейин этти экспорттой алат. Бул тууралуу бүгүн, 12-январда Айыл чарба, тамак-аш өнөр жайы жана мелиорация министри Тилек Токтогазиев өкмөт үйүндөгү брифингде билдирди.

"Азык-түлүк коопсуздугу боюнча көп өзгөртүүлөрдү жасашыбыз керек. Бизде мал чарбалары көп болгону менен өзүбүздү эт менен толугу менен камсыздай албай жатабыз. Ошондуктан эт продукциясы 14,7 пайыз эт сырттан келип жатат. Айыл чарбаны өнүктүрүүдө эки негизги потенциалды иштетүү тууралуу оюбуз бар. Бул транзиттик жана ички потенциал. Транзиттик потенциал жөнүндө айта кетсек, сырттан келип жаткан чийки затты кайра иштетип башка өлкөлөргө, ошол эле Кытайга, өнүккөн өлкөлөргө сата тургандай дараметибиз бар. Азыр этти сатуу боюнча иштер жүргүзүлүп жатат. Ал жактан этти арзан алып келип, бул жактан иштетип, кайра сатуу пландалууда. Учурда Араб өлкөлөрү менен жумасына 40 тоннадай этти экспорттоо тууралуу макулдашуулар жүрүп жатат. Өзүбүздүн гана ички рынокко басым кылсак, өнүгүү жөнүндө сөздү айтып кереги жок. Ошондуктан Кыргыз өлкөсү транзиттик потенциалын иштеп чыгышы керек", - деди Токтогазиев.