Ырчы Курал Чокоев Маданият министрлигинин чечими боюнча пикирин билдирди

Бүгүн, 13-январда Маданият, маалымат жана туризм министрлигинин 2011-жылдын 12-июнундагы буйругу менен Курал Чокоевге ыйгарылган "Маданияттын мыкты кызматкери" төш белгисин кайтарып алуу буйругуна кол коюлду.

Ошону менен бирге министрликтин тиешелүү мекемелерине ырчыны Кыргыз Республикасынын маданият, маалымат жана туризм министрлиги тарабынан өткөрүлүүчү мамлекеттик маданий массалык иш-чараларга белгилүү мөөнөткө чейин катыштырбоо сунушталды.

Бул боюнча ырчы Курал Чокоев төмөндөгүдөй пикирин билдирди.

"Маданияттын мыкты кызматкери деген белгиси эч кандай маани бербейт. Эгерде каалашса мен ал белгини (значокту) жана кагазын (документин) алып барып, колдоруна карматам. Бул жөн гана наам. Аты эле бар, чындыгында эч кандай пайдасы жок. Муну эски замандын калдыктары деп ойлойм.

Эгерде чындыгында эл жакшы көрсө, анда Инстаграм, ютуб каналдарына кошулуп көрө берет. Муну ошону менен чечим чыгарып койсок болот. Элдик артисттер миллиондон ашык болсун, Эмгек сиңирген артисттер 500 миңден ашык болсун. Маданият мыкты кызматкерлери 100 миңден ашык болсун", - деген ырчы Курал Чокоев.

Окуянын чоо-жайы:

Ырчы Курал Чокоев чет элдик долбоорду кайталайм деп коомдун сынына кабылып, талкуу чордонунан түшө элек. Артисттин бул долбоорунун айрым үзүндүлөрүн маданият, маалымат жана туризм министри Нуржигит Кадырбеков аргасыздан көргөнүн, ырчы эмнеге мындайга барганын түшүнө албай жатканын айтып, элден кечирим сурады. Ошондой эле Курал Чокоев менен Кайрат Примбердиевдин чыгармачылыгына чектөөлөр киргизилерин айткан.

Ал эми "Марал" радиосу Курал Чокоев, "Кыргыз" радиосу Курал мырза, Кайрат Примбердиев менен иштешүүнү токтотуп, ырларын уктурбай тургандарын билдиришкен. Ага улай эле "Ош Пирим" ТРКсы Курал Чокоевдин ырларына бойкот жарыялай турганын маалымдаган.

Ырчы айтылып жаткан сындардын баарын кабыл аларын, кетирген каталарынын үстүнөн иштей турганын айтып, долбоорду тартууну улантарын билдирген. Кийинчерээк, ырчы долбоор токтотулганын, буга чейин интернет желесине жарыяланган видеолор өчүрүлөрүн айтып чыкты. Ал эми долбоордун коногу болгон шоу-бизнес өкүлдөрү өздөрүнүн пикирлерин билдиришти.