Талас облусуна 3 миңден ашуун кыргыз жазуучуларынын китеби берилди

Бүгүн, 14-январда Талас облусуна 3 миңден ашуун кыргыз жазуучуларынын китеби берилди. Бул тууралуу өкмөттүн облустагы өкүлчүлүгүнөн билдиришти.

Билдирүүгө ылайык, китептерди мамлекеттик китепкананын директору Койчуман Момункулов тапшырды. Аталган иш-чарага өкмөттүн Талас облусундагы ыйгарым укуктуу өкүлү Айбек Бузурманкулов катышып китепкана кызматкерлери менен китепканалардын көйгөйлөрүн чечүү жолдору боюнча пикир алмашты.

"Бүгүнкү күнү, Талас облусунун китепканасына Америка ордосунан 1330 жана "Китеп палатасынан" 570 китеп келип түштү. Бардыгы кыргыз жазуучуларынын чыгармалары, бөбөктөр үчүн энциклопедия жана жомоктор. Учурда китептердин электрондук базасы түзүү боюнча иштер кызуу жүрүүдө", - деп айтылат мекеменин маалыматында.

Белгилей кетсек, бүгүнкү күндө Талас облусунун маданият бөлүмдөрүнө ар кайсы тармактан китептер келүүдө. Китептер алгач облустук китепканага түшүп андан соң райондорго бөлүнүп берилет.