Интернет колдонуучуларын күлкүгө салган Алёнушканын эстелиги аукционго коюлду

Орусиянын Воронеж облусундагы Новая Аленовка айылынын түптөөчүсү Алёнкага арналган эстелик аукционго коюлду. Анын баштапкы баасы - 1 миллион рублду түздү. Бул тууралуу орус басылмалары жазып чыгышты.

"Алёнушка аталышындагы искусствонун уникалдуу чыгармасы сатылууда. Бул объекттин даярдалган материалы: металл. Өндүрүлгөн күнү - 2020-жылдын 28-сентябры. Сатылуу 15-февралда англис тилиндеги ачык аукцион түрүндө өтөт. Катышуу үчүн билдирүүлөр 14-январдан 11-февралга чейин кабыл алынат", - деп айтылат билдирүүдө.

Белгилүү болгондой, эстеликтин салтанаттуу ачылышы 18-декабрда болгон. Бул жылы Новая Аленовка айылынын негизделгенине 250 жыл болгон. Уламышка ылайык, 250 жыл мурун Аленка жашоо үчүн жер издеп жүрүп, айыл негизделген жээктен кооз жер тапкан. Көп өтпөй кыз каракчылар тарабынан өлтүрүлүп, айыл баатыр кыздын атында аталып калган дешет. Аталган айылдын ордунда учурда Нововоронеж шаары орун алган.

Буга чейин аталган эстелик социалдык тармактарда резонанс жаратып, көпчүлүк колдонуучулардын сынына кабылган. Айрымдар аны коркунучтуу десе, айрымдар күлкүсүн жашырышкан эмес.