"Жанчыш керек", "Тишиңерди талкалайбыз". Садыр Жапаровдун тарапташы Бакай Кашкарбаевге кылмыш иши козголду

Сотторго жана прокурорлорго зомбулук көрсөтөм деп коркуткан видеоматериалдарды социалдык тармакка жарыялаган Бакай Кашкарбаев аттуу жаранга карата кылмыш иши козголду. Бул тууралуу Башкы прокуратурадан билдиришти.

Маалыматка ылайык, 2020-жылдын 15-17-ноябрга чейин Фейсбук социалдык тармагында 4 миң 981 колдонуучу бар аудиторияга BakaiKashkarbaev аттуу колдонуучу сотторго жана прокурорлорго зомбулук көрсөтөм деп коркуткан видеоматериалдарды жарыялаган.

Андан сон аталган социалдык тармактагы баракчанын колдонуучусу Бакай Кашкарбаев экендигин аныкталды. Анда ал мамлекеттик органдардын жетекчилерин агрессивдүү сынга алууга багытталган иш аркеттерди жүргүзгөн.

"2020-жылдын 15-ноябрында Кашкарбаев белгисиз адамдар тобу менен Чолпон-Ата шаарында Ысык-Көл облустук прокуратурасынын жетекчисине карата коркутууларды айтканы видеого түшүп калган. Мындан тышкары активист "Башын кесиш керек!", "Жанчыш керек", "Тишиңерди талкалайбыз!", "Көзүңөрдү чукуйбуз" деп элди көтөрүлүүгө үндөгөн.

2020-жылдын 16-ноябрында ал райондук соттун төрагасынын иш бөлмөсүнө кирип, ал жердеги тартип бузуу фактысын чагылдырган видео жарыялаган. Андан тышкары судья Т. Жумаев менен жолугушууну талап кылып жатканы ачык көрсөтүлгөн.

Өткөн жылдын 17-ноябрында Каракол шаарында Кашкарбаев адамдардын тобу менен Каракол шаардык сотунун административдик имаратынын алдында тартип бузууга аркет кылган иш аракеттерди улантышкан. Өз сөзүндө ал Ысык-Көл облусттук сотунун судьясы А.Апышевге жана облустук прокуратуранын бөлүм башчысы А.Нышановго карата ачык коркутууларды айткан", - деп жазылат маалыматта.

Аталган факты Кылмыштардын жана жоруктардын бирдиктүү ресстрине катталды. Учурда сотко чейинки өндүрүш иштери улантылууда.

Белгилей кетсек, бир нече маалымат булактары Бакай Кашкарбаевди Садыр Жапаровдун активдүү тарапташы экенин жазышкан. Ал Садыр Жапаров президенттин милдетин аткаруучу болуп турганда өзүн кеңешчи кылып алууну талап кылган видеосу социалдык тармактарга тараган.