Балбак Түлөбаев: "Жол кире акысын май айында 2-3 сомго, акырындап жылдын аягына чейин 15 сом кылып берели"

Бүгүн, 18-январда Бишкекте айрым маршруттук таксилердин айдоочулары линияга чыкпай жатканын окурмандар SUPER.KG порталына билдирди.

Ал эми шаардын мэринин милдетин аткаруучу Балбак Түлөбаев бул боюнча базар кыдырып, эл менен жолугушууда төмөнкүлөрдү билдирди.

"Бүгүн, маршруттук таксилердин айдоочулары 7 жылдан бери тарифтери көтөрүлбөй жумушка чыкпай жатышат. Биз алардын тарифин көтөрүп берүүгө даярбыз. Бирок алар бүгүн көтөрүп бергиле деп айтып жатат. Андай болбойт да. Мыйзам деген бар. Бүгүн тарифти 2-3 сомго көтөрө турган болсок, Экономика министрлигине кат жазып кайрылуу керек. Анан алар бизге 2 сомго, 3 сомго бааны көтөрсөк кандай болорун жазып берет. Андан соң биз аны Шаардык кеңешке киргизебиз. Апрелге чейин жетишсек Шаардык кеңешке киргизип беребиз. Жетишпесек, май айында 2-3 болобу элге кыйын болбогондой кылып, акырындап жылдын аягына чейин 15 сом кылып берели. Элди дагы түшүнүшсүн, биз дагы түшүнүп жатабыз", - деди Балбак Түлөбаев.