Маданият министрлигинин Кайрат Примбердиевди наамынан ажыратуу сунушу канааттандырылган жок

Буга чейин Маданият, маалымат жана туризм министрлиги ырчы Курал Чокоевдин чуулгандуу программасына конок катары катышкан Кайрат Примбердиевди "Кыргыз Республикасынын Эмгек сиңирген артисти" наамынан ажыратуу боюнча сунушту президенттик аппаратка расмий жөнөткөн.

Президенттик аппаратка караштуу сыйлыктар боюнча мамлекеттик комиссиясы министрликтин сунушун канааттандырган жок. Бул тууралуу бүгүн, 18-январда комиссиянын каты жарыяланды.

Маалым болгондой, Жазык кодекси боюнча мамлекеттик сыйлыктар, аскердик наамдар, класстык чиндер кызмат абалынан кыянаттык менен пайдаланган учурда же өтө оор кылмыш кылган учурда гана кайтарылып алынат. Ал эми Кайрат Примбердиевдин окуясында Эмгек сиңирген артисти наамын алууга мыйзамдуу негиз жок деп айтылат комиссиянын билдирүүсүндө.